პრემიერობის კანდიდატის, გიორგი გახარიას თქმით, 20 ივნისის აქციის დაშლის დროს, დაახლოებით, 800 ტყვია გამოიყენეს, თუმცა ზუსტ რიცხვს ვერ ასახელებს. ამის შესახებ მან ევროპული საქართველოს ფრაქციაქის სხდომაზე მოსმენის დროს განაცხადა.

"გამოვიყენეთ იმდენი ტყვია, რამდენიც საჭირო იყო", — ამბობს გახარია.

ამ საკითხზე მას კითხვა ევროპული საქართველოს დეპუტატმა, სერგი კაპანაძემ დაუსვა. ის დაინტერესდა ეს ინფორმაცია, რატომ არ მისცა მათ, ვინც ის უწყებიდან გამოითხოვა. თუმცა, პრემიერობის კანდიდატს ამ კითხვაზე კონკრეტული პასუხი არ გაუცია.

On.ge ამ ინფორმაციას შინაგან საქმეთა სამინისტროდან ორ თვეზე მეტია ითხოვს. სარჩელი ახლა უკვე თბილისის საქალაქო სასამართლოს აქვს გადაგზავნილი. მოთხოვნა უცვლელია, აქციის დაშლის დროს გამოყენებული ცრემლსადენი გაზისა და რეზინის ტყვიების რაოდენობაზე ინფორმაციის მიღება.

დღეს, 6 სექტემბერს მინისტრი, რომლის გადადგომასაც საზოგადოების ნაწილი 78 დღეა ითხოვს, მმართველმა პარტიამ დააწინაურა და პრემიერ-მინისტრობის კანდიდატად წარადგინა.