პრემიერ-მინისტრობის კანდიდატი, გიორგი გახარია ამბობს, რომ 20 ივნისის მოვლენების გამო პარლამენტის თავმჯდომარის თანამდებობიდან ირაკლი კობახიძის გადადგომის მოთხოვნა სამართლიანი არ იყო. ამის შესახებ გახარიამ ევროპული საქართველოს წევრის, ოთარ კახიძის კითხვის საპასუხოდ პარლამენტში განაცხადა.

კითხვაზე, მაშინ რატომ გადააყენეს კობახიძე თანამდებობიდან, გახარიამ უპასუხა:

"ეს იყო ბატონი ირაკლის გადაწყვეტილება, რომელმაც გარკვეული პოლიტიკური პასუხისმგებლობა აიღო თავის თავზე".

გახარია ამბობს, რომ მისი თანაგუნდელების მხრიდან არ მოუსმენია განცხადება, რომ ჯობდა, ირაკლი კობახიძე უფრო ადრე გადამდგარიყო. ასეთი შინაარსის განცხადება იუსტიციის მინისტრმა, თეა წულუკიანმა 28 ივნისს გააკეთა.

ირაკლი კობახიძემ თანამდებობიდან გადადგომა 21 ივნისს დაადასტურა.

20 ივნისის აქცია

მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.

სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. დაშავდა ათეულობით მოქალაქე, ორმა კი თვალი დაკარგა.