აქცია #სირცხვილიას ორგანიზატორები განმარტავენ, რომ მაკო გომურის სახელზე საშვი მოთხოვნილი ჰქონდათ, თუმცა იმის გამო, რომ წინა რამდენიმე დღე მათ უარს ეუბნებოდნენ საშვის დაშვებაზე, არც დღეს ჰქონდათ შეშვების გარანტია. მათი თქმით, სწორედ ამ მიზეზით მაკო გომურმა არ გადადო გეგმები და ქალაქგარეთ წავიდა, მაგრამ მას კითხვის დასმა სურდა.

"არ გვითხოვია, დარჩენილიყო და დიდი ალბათობით, ტყუილად მდგარიყო აქ. სანაცვლოდ კითხვა გამოგვიგზავნა და ეს კითხვა აუცილებლად და ძალიან მალე გაჟღერდება პარლამენტში, თუნდაც თვითონ ფიზიკურად არ იყოს აქ", — წერენ ორგანიზატორები ფეისბუქგვერდზე.

დღეს, 6 სექტემბერს ნაციონალური მოძრაობის დეპუტატმა, სალომე სამადაშვილმა პარლამენტში მოსმენაზე მისულ პრემიერობის კანდიდატ გიორგი გახარიას განუცხადა, რომ პარლამენტში არ უშვებდნენ აქციაზე დაშავებულ გომურს, რომელსაც საშვი ქონდა. გახარიამ განაცხადა, რომ ეს ტყუილია და გომური პარლამენტთან არ იდგა.

მაკო გომურმა ფეისბუქგვერდზე დაწერა, რომ ქალაქგარეთ იმყოფებოდა და საშვის დაშვებაზე ინფორმაცია არ ჰქონდა. ეს პოსტი მის ფეისუბქგვერდზე აღარ იძებნება.