შინაგან საქმეთა მინისტრობის კანდიდატი ვახტანგ გომელაური აცხადებს, რომ საგზაო მოძრაობის წესების ადმინისტრირების გასაუმჯობესებლად უწყება მობილური აპლიკაციის შექმნას გეგმავს. მისი განმარტებით, ამ აპლიკაციით ნებისმიერ მოქალაქეს საშუალება ექნება დააფიქსიროს და მიაწოდოს პოლიციას მის მიერ გამოვლენილი დარღვევები გზაზე.

ამის შესახებ გომელაურმა პარლამენტში პროგრამის წარდგენისას განაცხადა. დღეს პარლამენტში გაერთიანებული კომიტეტების სხდომაზე ძალოვანი სტრუქტურების მინისტრობის კანდიდატებს უსმენენ.

სამთავრობო ცვლილებები მას შემდეგ დაიწყო, რაც პრემიერ-მინისტრმა, მამუკა ბახტაძემ თანამდებობა ფეისბუქპოსტით დატოვა. ქართული ოცნების თავმჯდომარემ, ბიძინა ივანიშვილმა პრემიერობის კანდიდატად შსს-ს ყოფილი მინისტრი გიორგი გახარია წარადგინა, რომლის გადადგომასაც საზოგადოების ნაწილი 76 დღეა ითხოვს.