საქართველოს პარლამენტში გაერთიანებული კომიტეტის სხდომაზე სამთავრობო პროგრამის განხილვა პროტესტის ფონზე მიმდინარეობს. ამჟამად, საგარეო ურთიერთობათა და ევროპასთან ინტეგრაციის კომიტეტების გაერთიანებული სხდომაზე საგარეო საქმეთა მინისტრის მოვალეობის შემსრულებელს, დავით ზალკალიანს უსმენენ.

პარლამენტის შესასვლელთან შეკრებილები არიან სამოქალაქო აქტივისტები. მათ ნაწილს სურდა დასწრებოდა საკომიტეტო მოსმენას, თუმცა დაშვებული საშვების მიუხედავად, ვიცე-სპიკერ თამარ ჩუგოშვილის ბრძანებით, პარლამენტში არ შეუშვეს. შესასვლელთან საპატრულო პოლიციას კორდონი აქვს გაკეთებული. მსგავსი შეზღუდვა მოქმედებდა გუშინაც და გაგრძელდა დღესაც. პარლამენტში შესვლას ცდილობდა გაერთიანებული ოპოზიციის ლიდერი და ყოფილი დეპუტატი გიორგი ვაშაძე. ის აცხადებს, რომ მისი საშვით, ნებისმიერ დროს აქვს პარლამენტში შესავლის უფლება.

ქართული ოცნების დეპუტატი, თამარ ხულორდავა განმარტავს, რომ კომიტეტზე არდაშვება განპირობებულია შექმნილი რეალობით:

"გუშინაც ნახეთ, რომ სხდომის ჩაშლის გარკვეული მცდელობა იყო სახეზე, რაც არ არის სწორი, ეს კიდევ ერთხელ მიუთითებს იმაზე, რომ ჩვენი ოპონენტები მზად არ არიან საქმიან რეჟიმში ისაუბრონ".

აქციის მონაწილეები აპროტესტებენ სამთავრობო ცვლილებებს და პრემიერ-მინისტრობის კანდიდატად შს მინისტრის, გიორგი გახარიას წარდგენას.

საქართველოს პარლამენტში მთავრობის დამტკიცების პროცედურა დღეს, 4 სექტემბერს დაიწყო. დღესვე სამთავრობო პროგრამას წარადგენს ჯანდაცვის მინისტრი, ეკა ტიკარაძე და განათლების მინისტრი, მიხეილ ბატიაშვილი.