სახელმწიფო ინსპექტორის სამსახური შეისწავლის, დაარღვია თუ არა თიანეთის მერიამ პერსონალური მონაცემები, როდესაც წვევამდელთა გამწვევი კომისიის სხდომას ფეისბუქის პირდაპირი ეთერით გადასცემდა. ამის შესახებ On.ge-ს ინსპექტორის სამსახურში განუცხადეს.

ამავე საკითხზე On.ge რეგიონული განვითარებისა და ინფრასტრუქტურის სამინისტროს დაუკავშირდა. როგორც სამინისტროში On.ge-ს უთხრეს, კომისიის პირდაპირ ეთერში გაშვების პრეცედენტი აქამდე არ ჰქონიათ.

თიანეთის მუნიციპალიტეტის მერიამ წვევამდელთა გამწვევი კომისიის სხდომიდან 30 აგვისტოს ფეისბუქზე პირდაპირი ეთერი გაუშვა, სადაც ჩანს, რომ გირჩის მღვდელმსახურს დეზერტირს ეძახიან და სამხედრო სამსახურის გადავადებაზე უარს ეუბნებიან. კომისიის სხდომას ხუთი პირი ესწრებოდა და მას თიანეთის მერი, თამაზ მეჭიაური თავმჯდომარეობდა.

კომისიის თავმჯდომარის მოადგილემ თქვა, რომ დავით ოთარაშვილი ბიბლიური თავისუფლების მღვდელმსახური 27 აგვისტოს გახდა და ჯარში წასვლის გადავადებას ამ მიზეზით ითხოვდა. სანამ დავით ოთარაშვილი ოთახში შევიდოდა, თამაზ მეჭიაურმა იკითხა თუ როგორ მიემართათ მისთვის.

"წესი როგორი არის? მამაო თუ როგორ არის?" — რაზეც უპასუხეს, რომ პირი მღვდელმსახურია და, ალბათ, "მამაოთი უნდა მიმართონ".

მას შემდეგ, რაც ოთარაშვილი კომისიის ოთახში შევიდა, თამაზ მეჭიაურმა არაერთი კითხვა დასვა, რასაც დამამცირებელი შეფასებებიც მოჰყვა. გარდა ამისა, თამაზ მეჭიაურმა განაცხადა, რომ "დეზერტირობას ხელს ვერ შეუწყობს" და დავით ოთარაშვილს გადავადებას არ მისცემს.

On.ge დაუკავშირდა თამაზ მეჭიაურს და ჰკითხა, იცოდა თუ არა დავით ოთარაშვილმა სხდომის პირდაპირი ეთერის შესახებ და ხომ არ დაირღვა ამით მისი უფლებები.

"მას ვინ ეკითხება, უნდოდა თუ არ უნდოდა?.. განცხადება კანცელარიით იყო შემოსული და გაიარა მთელი სამსახური. ჩვენს სხდომებს ან პირდაპირი გადავცემთ ან ჩანაწერს ყოველთვის ვაკეთებთ. ვუშვებთ ჩვენი სათათბიროებიდან პირდაპირ ეთერებს, პირიქით, გამჭვირვალობა არის", — აღნიშნა მეჭიაურმა.