ნინოწმინდის მუნიციპალიტეტში, სოფელ სათხეში ახლადგახსნილ ეთნოგრაფიულ მუზეუმში ქართული ოცნების დეპუტატის, ენზელ მკოიანის ფოტო გამოფინეს. ინფორმაციას ადგილობრივი გამოცემა სამხრეთის კარიბჭე ავრცელებს.

მკოიანის თქმით, ის სოფელ სათხეშია დაბადებული და ვინაიდან დეპუტატია, ფოტოსა და ჯილდოების გამოფენა შესთავაზეს.

"იქ გამოფენილია იმ პროფესორების, აკადემიკოსების თუ მეცნიერების ფოტოები, რომლებიც სათხეში დაიბადნენ. მეც რახან დეპუტატი ვარ, ჩემი ფოტოც თვითონ გააკეთეს. თან მითხრეს ამ ჯილდოების დადება შეიძლებოდა თუ არა და დავთანხმდი. ჯილდოები სიმბოლურად იყო და ისევ უნდა ავიღო", — ამბობს დეპუტატი.

გამოცემის ცნობით, ალბერტ ისოინის სახელობის ეთნოგრაფიული მუზეუმი 24 აგვისტოს გაიხსნა. მათივე ინფორმაციით, მუზეუმი ალბერტ ისოიანის შვილის, არტურ ისოიანის დაფინანსებით აშენდა, რომელიც რუსეთში მოღვაწე ბიზნესმენია. მუზეუმში სოფლისათვის დამახასიათებელი ძველი ტრადიციული საყოფაცხოვრებო ნივთები და საოჯახო ფოტოებია გამოფენილი.