გადაცემა #სირცხვილია თიბისის დამფუძნებელ მამუკა ხაზარაძესა და ქართული ოცნების თავმჯდომარე ბიძინა ივანიშვილს დებატებისთვის საკუთარ გადაცემას სთავაზობს.

"მზადყოფნას ვაცხადებთ, დებატები წარიმართოს ჩვენი ნამდვილი საზოგადოებრივი მაუწყებლის ეთერში, პარლამენტის წინ, 20 საათსა და 20 წუთზე", — წერს გადაცემის წამყვანი შოთა დიღმელაშვილი.

დებატებში ივანიშვილი ხაზარაძემ გამოიწვია. მისი თქმით, მზად არის ანაკლიის პორტთან დაკავშირებით ტელევიზიაში ღიად ისაუბრონ.

"ეს შეიძლება იყოს [ტელეკომპანია] იმედი. ვისაუბროთ ღიად. რა წინაპირობა ჰქონდა, რა მოლაპარაკებები იყო, რა საუბრები იყო, რომელიც საზოგადოებამ არ იცის. სამუდამოდ ეს ქვეყანა დაადგეს გამჭვირვალობის გზას, დავადგეთ პირდაპირი ურთიერთობის გზას, ჩავაბაროთ ანგარიში საზოგადეობას", — განაცხადა მამუკა ხაზარაძემ.

დღეს, 27 აგვისტოს პრესკონფერენციაზე ხაზარაძემ და ჯაფარიძემ განაცხადეს, რომ ფინანსური მონიტორინგის სამსახურმა ბრიტანეთს ანტიტერორისტული თანამშრომლობის ფარგლებში მათი ფინანსების კანონიერების შესწავლა თხოვა და ანგარიშების დაყადაღების მოთხოვნით მიმართა.