ბოლო სამწლიანი მაუწყებლობის განმავლობაში რუსთავი 2-ს ყველაზე დაბალი რეიტინგი გუშინ, 21 აგვისტოს ჰქონდა, როცა ჟურნალისტებმა ტელევიზია პროტესტის ნიშნად დატოვეს. მონაცემები On.ge-ს თი-ვი ემ-არ საქართველომ მიაწოდა.

21 აგვისტოს (18+ სამიზნე აუდიტორიისთვის) საშუალო დღიური AMR (მაყურებლის წილი დროის მოცემულ მონაკვეთში) 2,47% იყო და SHARE (ჩართული ტელევიზიების წილი დროის მოცემულ მონაკვეთში) კი 16,15%.

ბოლო სამ წელში ამ მონაცემებზე დაბალი მაჩვენებელი მხოლოდ ერთხელ, 2017 წლის 18 თებერვალს დაფიქსირდა, როცა არხმა მაუწყებლობა შეწყვიტა.

კომპანია თი-ვი ემ-არ საქართველო, ნილსენის სატელევიზიო აუდიტორიის გაზომვების ოფიციალური ლიცენზირებული პარტნიორია. იგი დაარსდა 2004 წელს და 2005 წლის პირველი იანვრიდან უწყვეტად აწვდის საქართველოს სატელევიზიო ბაზარს კვლევის შედეგებს.