ნინო შუბლაძე აცხადებს, რომ რუსთავი 2-ის მმართველებმა არხზე დაბრუნება შესთავაზეს, თუმცა გადაწყვეტილება არ მიუღია. ამის შესახებ შუბლაძემ Facebook-ზე დაწერა.

"პირველ რიგში, დავიწყებ იმით, რომ არ მიმიღია გადაწყვეტილება მედიაში და კერძოდ, რუსთავი2-ში დაბრუნების თაობაზე. შემოთავაზება მივიღე მხოლოდ... მეორე დღეა ვუყურებ სრულ ისტერიას… ოდესმე ამ შოკიდანაც, ალბათ, გამოვალ...

ენას ძვალი არ აქვს, თუმცა, ვინც მიცნობს, ზუსტად იცის, არასოდეს არც მორალურ ზღვარს გადამიბიჯებია ადამიანებთან, ჩემს კოლეგებთან ურთიერთობაში, მიუხედავად იმისა, რომ მარტივი წლები არ გაგვივლია ერთად... არც ახლა გადავალ ამ ზღვარს... პ.ს. როგორც ჩემმა დამ მითხრა, საქმემან ჩემმან წარმომაჩინოს..." — წერს შუბლაძე.

გუშინ, 20 აგვისტოს რუსთავი 2-ის გენერალურმა დირექტორმა, პაატა სალიამ საინფორმაციო სამსახურის უფროსი, ნოდარ მელაძე თანამდებობიდან მოხსნა და დაადასტურა, რომ მის ნაცვლად ნინო შუბლაძე განიხილებოდა. ამ ინფორმაციის გავრცელებიდან რამდენიმე საათში რუსთავი 2-ის ყოფილმა დირექტორმა, ნიკა გვარამიამ თქვა, რომ შუბლაძემ არხზე მუშაობის დროს ხელისუფლების წარმომადგენლებს ტელევიზიის განადგურებაზე ესაუბრებოდა და ამის ამსახველი ჩანაწერებიც აქვს.