საერთაშორისო გამჭვირვალობა - საქართველოს განცხადებით, 5 ოქტომბერს თბილისში „ერთიანი ნაციონალური მოძრაობის“ მიერ ორგანიზებულ აქციაზე პარტიის მხრიდან ამომრჩევლის მოსყიდვის სავარაუდო ნიშნები დაფიქსირდა.

TI მედიით გავრცელებულ ინფორმაციას ეხმიანება, რომლის თანახმად, აქციის ზოგიერთი მონაწილე ამბობდა, რომ აქციაზე დასასწრებად ენმ-მ ფული წინასწარ გადაუხადა.

„მოქალაქეთა პოლიტიკური გაერთიანებების შესახებ“ საქართველოს კანონის მიხედვით „პარტიას ეკრძალება კანდიდატის, წარმომადგენლის ან სხვა პირის მეშვეობით, პირდაპირ ან არაპირდაპირ, საქართველოს მოქალაქისათვის ფულადი სახსრების, საჩუქრებისა და სხვა მატერიალურ ან არამატერიალურ ფასეულობათა გადაცემა“.

საერთაშორისო გამჭვირვალობა - საქართველო სახელმწიფო აუდიტის სამსახურს მოუწოდებს შეისწავლოს აღნიშნული გავრცელებული ინფორმაცია. კანონდარღვევის აღმოჩენის შემთხვევაში კი მიმართოს შესაბამის ზომებს.