უძველესი რომაული ქალაქის, პომპეის გათხრისას არქეოლოგებმა ხის ყუთის ანჯამები აღმოაჩინეს. ხე, ბუნებრივია, დიდი ხნის გახრწნილი იყო, თუმცა ყუთის შიგთავსი მეცნიერებმა კვლავ თავის ადგილას, პომპეის ფერფლში იპოვეს. პომპეი ჩვენი წელთაღრიცხვით 79 წელს ვულკან ვეზუვის ამოფრქვევამ სრულად გაანადგურა.

ჯამში არქეოლოგებმა 100-მდე პატარა ნივთი იპოვეს, მათ შორისაა ძვლებისგან დამზადებული ღილები, გამოთლილი ხოჭოები, მინიატურული პენისები, კრისტალები, პაწაწინა თავის ქალები და პატარა თოჯინები.

მიჩნეულია, რომ ეს ნივთები ჯადოქარს ეკუთვნოდა, რომლებსაც ის მომავლის წინასწარმეტყველებისთვის იყენებდა. რესტავრატორებმა აღნიშნული ნივთები უკვე გაწმინდეს, ახლა კი ისტორიკოსები და არქეოლოგები მათი ზუსტი მნიშვნელობის დადგენას ცდილობენ.

ფოტო: Archaeological Park of Pompeii

"ეს ის ობიექტებია, რომლებსაც ქალები ყოველდღიურად იყენებენ. ეს ნივთები განსაკუთრებულია, რადგან თითოეული მათგანი ადგილობრივების — იმ ადამიანების ისტორიასა და ბიოგრაფიას გვიყვება, რომლებიც ცდილობდნენ, რომ ამოფრქვევას გაქცეოდნენ", — აცხადებს პომპეის არქეოლოგიური პარკის გენერალური დირექტორი მასიმო ოსანა.

აღმოჩენილ ნივთებში ოქროსა და სხვა ძვირფასეულობას ვერ ვხვდებით, რაც ნიშნავს, რომ ეს აღჭურვილობა მონას ან მოსამსახურეს ეკუთვნოდა.

ეს ნივთები, სავარაუდოდ, გამრავლებასა და ორსულობასთან დაკავშირებულ რიტუალებში გამოიყენებოდა. ასევე დასაშვებია, რომ ეს აღკაზმულობა ყელსაბამებადაც გამოეყენებინათ.

არქეოლოგებმა ოთახში, რომელშიც ყუთი აღმოჩნდა, განამარხებული ადამიანებიც იპოვეს, მათ შორის არიან ქალები და ბავშვებიც. ახლა არქეოლოგები დნმ-ს ანალიზით ცდილობენ დაადგინონ, თუ რა ოჯახური კავშირები იყო მათ შორის.

"ეს ყუთი, შესაძლოა, ოთახში მყოფ რომელიმე ადამიანს ეკუთვნოდა", — აცხადებს ოსანა.