ნეპალის მთავრობის გადაწყვეტილებით, ადამიანებს, რომლებსაც ევერესტის მთის დალაშქვრა სურთ, მთაზე ასვლისას მოუწევთ ახალ, გამკაცრებულ წესებს დაემორჩილონ და დაამტკიცონ, რომ გამოცდილი მთამსვლელები არიან.

მსგავსი ზომების მიღების მიზეზი კი ბოლო დროს გახშირებული მსხვერპლია, რომელმაც უკვე საგანგაშო რიცხვს მიაღწია — ბოლო ერთი წლის განმავლობაში მთაზე სულ 11 ადამიანი დაიღუპა, ან დაიკარგა.

აპლიკანტებს მსოფლიოში ყველაზე მაღალი მწვერვალის საბოლოო დაპყრობამდე ამავე მთაზე 6 500 მეტრის სიმაღლეზე (უმაღლესი წერტილი 8 848 მეტრია) ასვლის გამოცდილება და ფსიქიკური ჯანმრთელობის დამადასტურებელი საბუთი უნდა ჰქონდეთ.

ფოტო: outsideonline

"ჩვენ ყველანაირ ზომებსა და რეგულაციებს შემოვიღებთ, რათა მსოფლიოს სხვადასხვა კუთხიდან ჩამოსული მთამსვლელებისთვის, ჩვენი მთები უფრო უსაფრთხო გავხადოთ", — აცხადებს ნეპალის ტურიზმის მინისტრი.

აღსანიშნავია, რომ მსოფლიოს 14 ყველაზე მაღალი მწვერვალიდან, რვა სწორედ ნეპალში მდებარეობს.