სპერმის განცალკევების ახალი მეთოდის გამოყენებით ხელოვნური განაყოფიერებისას მშობლებმა მომავალში, შესაძლოა, ბავშვის სქესის სურვილისამებრ არჩევა შეძლონ.

იაპონელმა მეცნიერებმა ჩამოაყალიბეს ახალი მეთოდი, რომლითაც მათ თაგვებში X ქრომოსომის შემცველი სპერმატოზოიდების Y-ქრომოსომიანი სპერმატოზოიდებისგან განცალკევება შეძლეს.

მეცნიერების თქმით, მათ ახალი მიდგომა მაშინ აღმოაჩინეს, როდესაც X და Y-ქრომოსომიან სპერმატოზოიდებს შორის არსებულ შესაძლო განსხვავებებს (X-ქრომოსომიან სპერმატოზოიდში ბევრად უფრო მეტი გენია) სწავლობდნენ.

"ეს პირველი კვლევაა, რომელიც X-და Y-ქრომოსომიან სპერმატოზოიდებს შორის განსხვავებებს დასაბუთებულად აჩვენებს", — აცხადებს ჰიროშიმას უნივერსიტეტის მეცნიერი და კვლევის თანაავტორი მასაიუკი შიმადა.

შიმადას თქმით, ახალი მეთოდი სოფლის-მეურნეობაშიც სასარგებლო იქნება.

"ფერმებში ძროხები ბევრად უფრო ფასობს, ვიდრე ხარები. რადგან რძე მხოლოდ ძროხებისგან მიიღება", — ამბობს ის.

აღსანიშნავია, რომ ამ დრომდეც არსებობდა გარკვეული მეთოდები, რომლითაც სპერმატოზოიდების დახარისხება შეიძლება, მაგალითად, გამდინარე ციტომეტრია. თუმცა ეს მიდგომა ძვირია და ის სპერმატოზოიდების გაცალკევებას X და Y ქრომოსომების მიახლოებით ზომის მიხედვით აწარმოებს.

იაპონელი მეცნიერების მიერ შემუშავებული მეთოდი კი სპეციალური მედიკამენტის გამოყენებით X ქრომოსომის შემცველი სპერმის მოძრაობას აფერხებს, რაც საბოლოოდ მეცნიერებს Y და X სპერმის ერთმანეთისგან განცალკევების საშუალებას აძლევს. მედიკამენტი თაგვის სპერმატოზოიდებზე არსებულ ერთ-ერთ რეცეპტორს იყენებს. აღსანიშნავია, რომ სპერმატოზოიდებზე მედიკამენტის რაიმე უარყოფითი გავლენა არ დაფიქსირებულა.

გადარჩეული სპერმატოზოიდებით სასურველი სქესის მიღება მეცნიერებმა შემთხვევების დაახლოებით 80 პროცენტში შეძლეს.

შიმადას თქმით, თუ ასეთი რეცეპტორი ადამიანის სპერმატოზოიდებზეც აღმოჩნდება, ამ მეთოდის გამოყენება ადამიანებშიც შესაძლებელი გახდება.

გუნდი იაზრებს, რომ ადამიანებში ამ მეთოდის გამოყენება ეთიკურ პრობლემებს წარმოშობს. თუმცა აღსანიშნავია, რომ ხელოვნური განაყოფიერებისას მიღებული ემბრიონების სქესის შემოწმება ახლაც შესაძლებელია. მაგალითად, აშშ-ში მშობლებს საკუთარი ბავშვის სქესის არჩევა ახლაც შეუძლიათ, თუმცა დიდ ბრიტანეთში ხელოვნური განაყოფიერებით მიღებული ემბრიონების სქესისმიერი გადარჩევა აკრძალულია.

აღსანიშნავია, რომ გადარჩეული სპერმატოზოიდების გამოყენებით დაბადებული თაგვები თითქოს ჯანმრთელები იყვნენ, თუმცა მსგავსი მეთოდების გამოყენებამდე ამ მეთოდის შესაძლო გრძელვადიანი ეფექტები სრულად უნდა იყოს შესწავლილი.

კვლევა ჟურნალ PLOS Biology-ში გამოქვეყნდა.