უეფამ თბილისის დინამოს საჩივარი არ დააკმაყოფილა, რაც ნიშნავს, რომ 15 აგვისტოს როტერდამის ფეიენორდთან მატჩი დინამო არენაზე გულშემატკივრის გარეშე ჩაივლის. ამის შესახებ ინფორმაცია თავად დინამომ გაავრცელა.

უეფას ეთიკისა და დისციპლინის ორგანომ უეფას ეგიდით გასამართ მატჩზე (დინამო – ფეიენოორდი) მაყურებელს დასწრება აუკრძალა. ოფიციალური განცხადებით, გადაწყვეტილების მიზეზი უეფა ევროპალიგის მეორე საკვალიფიკაციო ეტაპის მატჩზე (დინამო – გაბალა) დინამო თბილისის გულშემატკივრების რასისტული ქმედება გახდა.

საქართველოს პირველი არხისთვის გახდა ცნობილი, რომ უეფა-ს მოსაზრებით, საფუძველი რასისტული, ნაცისტური შეძახილები და ბანერები გახდა, რის გამოც დინამო ადრეც იყო გაფრთხილებული. მსგავსი შემთხვევა გაბალასთან თბილისური მატჩის დროს განმეორდა და მას უეფა-ში ასეთი კვალიფიკაცია მისცეს – "გულშემატკივართა რასისტული გამოხდომა".

ასევე დინამოს დაევალა, რომ თამაშის მიმდინარეობისას გამოფინოს ბანერი სიტყვებით #EqualGame, რომელზეც უეფას ლოგოც იქნება. ამ ბანერმა უნდა დაფაროს პირველი, მე-2 და მე-18 სექციები.

ასევე დინამო დაჯარიმდა 50 000 ევროთი, გულშემატკივრების რასისტული ქცევის გამო.