საქართველოს ჟურნალისტური ეთიკის ქარტიის მიერ სატელევიზიო არხების მონიტორინგის შედეგების მიხედვით, რუსთავი 2 -ის საინფორმაციო გამოშვებებში ყველაზე მეტი დრო ნაციონალურ მოძრაობას დაეთმო:

"წინა პერიოდებში, რუსთავი-2-ზეც მთავრობა ლიდერობდა. ყველაზე დადებითად მიხეილ სააკაშვილი წარმოჩინდა, მისთვის დათმობილი დროის 100%-ში, ყველაზე მეტი უარყოფითი ტონი, ანუ 52 პროცენტი ადგილობრივ ხელისუფლებას ჰქონდა. ყველაზე მეტი ნეიტრალურ ტონში გაშუქება, 100 პროცენტი, ბლოკს - პატრიოტთა ალიანსი ჰქონდა".

კვლევის მიხედვით,ეთიკური თვალსაზრისით რუსთავი 2-ზეც კვლავ პრობლემად რჩება ბალანსის დარღვევის ფაქტები. რუსთავი 2 კვლავ გამოირჩევა ბიძინა ივანიშვილის და ქართული ოცნების მიმართ განსაკუთრებული კრიტიკულობით.

სამონიტორინგო პერიოდში რუსთავი 2-ის ეთერში მონიტორები აკვირდებოდნენ მთავარ საინფორმაციო გამოშვებას, ყოველ დღე 21:00 საათზე, ასევე იმედის ეთერში ქრონიკას, ყოველ დღე 20:00 საათზე.

მონიტორინგის შედეგად, ტელეკომპანია იმედზე, ყველაზე მეტი დრო ქართული ოცნების გაშუქებას დაეთმო, ყველაზე დადებითად პარტიებს შორის, ქართული ოცნება წარმოჩინდა 8 პროცენტით, ყველაზე უარყოფითად, 60 პროცენტით, საარჩევნო სუბიექტებს შორის ნაციონალური მოძრაობა გაშუქდა, ხოლო, ნეიტრალური გაშუქების ყველაზე მაღალი მაჩვენებელი, 94 პროცენტი, პრემიერ-მინისტრს ჰქონდა.

გამოკვლევის თანახმად, ქართული ოცნების დადებითად წარმოჩენის მცდელობა გარდა რაოდენობრივი ანალიზისა შინაარსობრივ მაგალითებშიც შესამჩნევია.

მონიტორინგი ევროკავშირისა და გაეროს განვითარების პროგრამის მიერ დაფინანსებული პროექტის, 2016 წლის საპარლამენტო არჩევნების მედიაში გაშუქების კვლევა, ფარგლებში სატელევიზიო არხების მონიტორინგს ახორციელებს.

მონიტორინგი ხორციელდებოდა შემდეგ სატელევიზიო არხებზე: საზოგადოებრივი მაუწყებლის პირველი არხი, რუსთავი 2, იმედი, მაესტრო, GDS, ტაბულა, კავკასია, ტვ პირველი, ობიექტივი, აჭარის ტელევიზია, ტელეარხი 25. მონიტორინგში მოცემულია 30 აგვისტო-25 სექტემბერი პერიოდი.