Apple აგრძელებს პროგრამას, რომლის ფარგლებშიც ის ნებისმიერ ადამიანს, რომელიც iOS-ის ან macOS-ის გატეხვას შეძლებს ერთ მილიონ დოლარს გადაუხდის.

კომპანიამ მსგავსი პროგრამა პირველად 2016 წელს წამოიწყო, როდესაც ის ადამიანებს iOS-ისა და macOS მოწყობილობებში პროგრამული შეცდომის აღმოჩენის სანაცვლოდ $200 000-ს სთავაზობდა.

ლას-ვეგასში 3-8 აგვისტოს კონფერენცია Black Hat ჩატარდა, სადაც ეფლის უსაფრთხოების დეპარტამენტის ხელმძღვანელმა, ივან კრსტიცმა განახლებულ პროგრამაზე ისაუბრა.

შემოდგომიდან პროგრამული შეცდომის აღმომჩენი $1 000 000-ით დაჯილდოვდება, პროგრამა კი ეფლის ყველა პლატფორმას შეეხება: iOs, iCloud, tvOS, iPadOS, watchOS და macOS.

ამ ჯილდოს გადაცემა მხოლოდ იმ შემთხვევაში მოხვდება, თუ ადამიანი ამ რომელიმე სისტემაზე სრული წვდომის მოპოვებას მოწყობილობასთან შეხების გარეშე მოახერხებს.

გამოცხადებულია სხვა ტიპის ჯილდოებიც. მაგალითად, თუ შეძლებთ, რომ აიფონის ეკრანის ბლოკს გვერდი აუაროთ, თქვენ $100 000-ს მიიღებთ.

ერთი მილიონი დოლარი, შესაძლოა, დიდ თანხად მოგეჩვენოთ, მაგრამ პროგრამული შეცდომები ბაზარზე საკმაოდ ძვირად ფასობს. მაგალითად, 2016 წელს, უსაფრთხოების სფეროში მომუშავე კომპანია Zerodium აიფონის დაჰაკვისთვის $1 500 000-ს იძლეოდა, შემდეგ კი საპრიზო ფონდი ორ მილიონ დოლარამდეც კი გაიზარდა.

აღსანიშნავია, რომ დიდი კომპანიები და სახელმწიფოები უსაფრთხოების სფეროში მომუშავე სპეციალისტებს ახალი პროგრამული შეცდომების აღმოჩენისთვის ზოგჯერ უფრო დიდ თანხებსაც უხდიან.