ფრანგმა გამომგონებელმა ფრანკი ზაპატამ 4 აგვისტოს მის მიერ შექმნილი რეაქტიული ჰოვერბორდით ლა-მანშის სრუტე გადაკვეთა.

ზაპატამ სტარტი სანგატაში, საფრანგეთში აიღო, 22 წუთის შემდეგ კი ის ინგლისში, დოვერში დაეშვა. ჯამში მან ჰოვერბორდით 32 კილომეტრი დაფარა, მის მიერ განვითარებული მაქსიმალური სიჩქარე კი საათში 180 კილომეტრი იყო.

"ჩვენ ჰოვერბორდი ჯერ კიდევ სამი წლის წინ შევქმენით. ახლა კი ინგლისის არხი პირველად გადავკვეთეთ", — განაცხადა მან დაშვების შემდეგ.

ზაპატას ჰოვერბორდს მხოლოდ 10 წუთის სამყოფი საწვავი ჰქონდა, რის გამოც ის სრუტეში წინასწარ გამზადებულ გემზე საწვავის შესავსებად ერთხელ შეჩერდა.

ეს ლა-მანშის სრუტის გადაკვეთის მეორე მცდელობა იყო. ზაპატას პირველი მცდელობა ივლისში წარუმატებლად დასრულდა, ის საწვავის შესავსებ გემს რამდენიმე სანტიმეტრით აცდა და წყალში ჩავარდა.

ზაპატამ ჰოვერბორდი, რომელიც ჰაერის ნაცვლად წყლის ნაკადს იყენებდა, ჯერ კიდევ 2011 წელს გამოიგონა. მოგვიანებით კი მან ჰაერის ნაკადზე მომუშავე ჰოვერბორდიც შექმნა, რომელიც ოთხი ტურბორეაქტიული ძრავითაა აღჭურვილი.

ფრანკი ზაპატამ ივლისის შუა რიცხვებში საზოგადოების დიდი ყურადღება მიიქცია, როდესაც ის საფრანგეთში, ბასტილიის დღის აღსანიშნავ ღონისძიებაზე ჰოვერბორდზე ხელში იარაღით გამოჩნდა.