ფორმულა კრეატივი მიიჩნევს, რომ შპს ინტერ მედიაში პროკურატურის შესვლის მიზანია ხელი შეუშალოს გააკეთონ ტელევიზია. ამის შესახებ განცხადება On.ge-ს კომპანიიდან მიაწოდეს.

"იმედს ვიტოვებთ, რომ ხელისუფლებას ეყოფა კეთილგონიერება და არ გააგრძელებს სიტყვის და გამოხატვის თავისუფლების ჩახშობის მცდელობას. ამასთან, ჩვენ მკაფიოდ გვინდა განვაცხადოთ, რომ დაანონსებული ახალი სატელევიზიო პლატფორმა აუცილებლად შეიქმნება, მიუხედავად იმისა თუ რა უკანონო ქმედებებს განახორციელებს ხელისუფლება პროკურატურის ან სხვა სახელმწიფო ორგანოების მეშვეობით", — განმარტავენ ფორმულა კრეატივში.

16 ივლისს რუსთავი 2-ის 9-პროცენტიანი წილის ყოფილი მფლობელის, ნინო ნიჟარაძის ადვოკატმა, გიორგი ყავლაშვილმა გენერალურ პროკურატურაში ნიკა გვარამიას წინააღმდეგ საჩივარი შეიტანა. ნინო ნიჟარაძე ტელეკომპანიის დირექტორის მიერ უფლებამოსილების ბოროტად გამოყენების მუხლით გამოძიების დაწყებას ითხოვს. ისევ აცხადებდა, რომ გვარამიას გადაწყვეტილებებმა არხს ზიანი მიაყენა.

რამდენიმე დღის წინ გახდა ცნობილი, რომ ფორმულა კრეატივი ტელევიზიის გახსნას გეგმავს. პარალელურად, არხის გახსნა დააანონსა ტელეკომპანია რუსთავი 2-ის ყოფილმა დირექტორმა, ნიკა გვარამიამ. დღეს, პირველ აგვისტოს ყოფილი ხელისუფლების მაღალჩინოსანმა და ახლა უკვე ბიზნესმენმა, დავით კეზერაშვილმა თქვა, რომ საქართველოში ტელევიზიას ქმნის.

ფორმულა კრეატივი ცნობილია მისი მთავარი პოპულარული პროდუქტით, ყველაზე წარმატებული ქართული სერიალით "ჩემი ცოლის დაქალები", რომელსაც კომპანია რუსთავი 2-ის დაკვეთით იღებდა. ის ასევე ინტერნეტგამოცემა On.ge-ს მეწილეცაა. გარდა ამისა, კრეატივის გუნდს ეკუთვნის ფილმები "რაც ყველაზე ძალიან გიყვარს", "ტაქსი", "ჭამა და სექსი", ასევე, მრავალი კომპანიის სარეკლამო რგოლი და ხმაურიანი კამპანია.