გამოცემა The Atlantic-მა გაასაჯაროვა რონალდ რეიგანისა და რიჩარდ ნიქსონის სატელეფონო საუბარი, სადაც რეიგანი აფრიკელ დელეგატებს "მაიმუნებს" უწოდებს. სატელეფონო საუბარი 1971 წელს არის გაკეთებული, მაშინ რეიგანი კალიფორნიის შტატის გუბერნატორი იყო, ხოლო ნიქსონი აშშ-ს პრეზიდენტი.

რეიგანი, რომელიც ტაივანის მხარდამჭერი იყო, მაშინ აღშფოთებული იყო იმით, რომ გაერომ ჩინეთის სახალხო რესპუბლიკა აღიარა და აშშ-ს არ დაუჭირა მხარი. კენჭისყრით გახარებულმა ტანზანიის დელეგაციამ კი ცეკვა დაიწყო.

დაარქივებული აუდიოჩანაწერი ნიქსონის საპრეზიდენტო ბიბლიოთეკისა და მუზეუმის ყოფილმა დირექტორმა, ისტორიის პროფესორმა ტიმ ნაფტამ აღმოაჩინა. მან The Atlantic-ში დაწერა, რომ პირველად აღნიშნული აუდიოჩანაწერი 2000-ში გასაჯაროვდა, როდესაც რეიგანი ჯერ კიდევ ცოცხალი იყო, მაგრამ მაშინ აღნიშნული შინაარსის წინადადება ამოჭრილი იყო.

ტიმ ნაფტამ სატელეფონო საუბრის გასაჯაროება რეიგანის გარდაცვალების შემდეგ კიდევ ერთხელ ითხოვა და ეროვნულმა არქივმა ის ორი კვირის წინ გამოაქვეყნა.

რეიგანი ამბობს: "მაიმუნები აფრიკული ქვეყნებიდან — ჯანდაბა, ისინი ჯერ კიდევ არაკომფორტულად გრძნობენ თავს ფეხსაცმელში". გუბერნატორის ამ ფრაზაზე ნიქსონის სიცილი ისმის.

როგორც ნაფტა წერს, რეიგანმა ნიქსონს დაურეკა, რათა აშშ-ს გაერო დაეტოვებინა, მაგრამ შემდგომში პრეზიდენტმა თქვა, რომ რეიგანის ზარის მიზანი "აფრიკელი დელეგატებზე ჩივილი" იყო. გარდა ამისა, ნაფტა ამბობს, რომ ნიქსონმა მოგვიანებით თავის სახელმწიფო მდივანს დაურეკა და უთხრა, რომ რეიგანმა ტანზანიელი დელეგატები "კაციჭამიებად" მოიხსენია, რომლებიც "ფეხსაცმელსაც" არ ატარებდნენ.

რონალდ რეიგანი პრეზიდენტის პოსტს 1981-1989 წლებში იკავებდა. ის აშშ-ს ისტორიის ერთ-ერთ ყველაზე წარმატებულ პრეზიდენტად მიიჩნევა. მის მმართველობის წლებს უკავშირდება ცივი ომის კულმინაცია და საბჭოთა კომუნიზმის დასასრულის დასაწყისი. 2004 წელს აშშ-ს მე-40 პრეზიდენტი 93 წლის ასაკში ალცჰაიმერის დაავადებით გარდაიცვალა.