16 აგვისტოს ფსიქოლოგიური დრამა გონებაზე მონადირე ნეტფლიქსზე მეორე სეზონით ბრუნდება. დიდი ლოდინის შემდეგ, ახალი სეზონის პირველი ტიზერიც ვიხილეთ.

1-წუთიანი ვიდეოდან ვიგებთ, რომ ახალ სეზონში FBI-ის აგენტები ჰოლდენ ფორდი (ჯონათან გროფი) და ბილ ტენჩი (ჰოლტ მაკკელანი) ციხეში ბრუნდებიან და ჩარლზ მენსონსაც ხვდებიან.

დევიდ ფინჩერის პროდიუსერობით გადაღებული სერიალის მეორე სეზონში სულ 9 ეპიზოდს უნდა ველოდოთ. სერიულ მკვლელებზე გადაღებული სერიალის მეორე სეზონში მოქმედება 1979-1981 წლებში მოხდება და პირველი სეზონიდან 2 წელი იქნება გასული (ისევე, როგორც რეალურ სამყაროში). სიუჟეტი ფოკუსირდება ატლანტას სერიულ მკვლელობებზე, რომელსაც მინიმუმ 28 ბავშვი, თინეიჯერი და მოზარდი ემსხვერპლა.

სერიალის პირველი სეზონი ნეტფლიქსზე 2017 წელს გამოვიდა. მასში FBI-ის აგენტები ფსიქოლოგ ვენდი კართან ერთად სასტიკი მკვლელების ისტორიებს ეცნობიან. აგენტები ციხეებში მიდიან და საშიშ დამნაშავეებთან პირად გასაუბრებებს მართავენ, რაც მათ სამომავლოდ სერიული მკვლელების ფსიქოლოგიის გაგებაში, ქცევების ამოხსნასა და გაანალიზებაში დაეხმარებათ.