"ეს არის დამოკიდებულება, როცა შენ გინდა გაექცე სარკეს, რომელშიც შენი თავი არ მოგწონს და ამიტომ ამ სარკეს ამტვრევ", — ასე შეაფასა საქართველოს ექსპრეზიდენტმა, გიორგი მარგველაშვილმა რუსთავი 2-ის საქმეზე ხელისუფლების დამოკიდებულება. მისი განმარტებით, ახლა მთავრობა ამ სარკის ანუ რუსთავი 2-ის მტვრების პროცესშია.

მარგველაშვილმა აღნიშნა ისიც, რომ მედია შეიძლება აჩვენებდეს პრობლემას ცუდ ამბავზე აქცენტით, "გამრუდებულად" მაგრამ ეს არ ცვლის იმას, რომ პრობლემა არსებობს. ამის შესახებ მან კვირის აქცენტებში ისაუბრა.

ექსპრეზიდენტმა აქამდეც განახცადა, რომ რუსთავი 2-ის სარედაქციო დამოუკიდებლობას საფრთხე ექმნება და თანამშრომლებს გამოხატვის თავისუფლების დაცვისკენ მოუწოდა.

მას შემდეგ, რაც სტრასბურგის სასამართლომ რუსთავი 2-ის საქმეზე ევროპული კონვენციის არცერთი მუხლის დარღვევა არ დაადგინა და აღსრულების დროებითი მექანიზმი შეაჩერა, არხი ქიბარ ხალვაშმა გადაიფორმა. მან გადააყენა დირექტორი ნიკა გვარამია და ამ თანამდებობაზე პირადი ადვოკატი პაატა სალია დანიშნა.

რუსთავი 2-ის ჟურნალისტები აცხადებენ, რომ ქიბარ ხალვაში ხელისუფლების გეგმას ახორციელებს და კრიტიკული მედიის დახურვა სურთ. ისინი ახალი გენერალური დირექტორისგან და მფლობელისგან არხის სარედაქციო პოლიტიკის ხელშეუხებლობის გარანტიებს ითხოვენ. აღნიშნულს, ქიბარ ხალვაში არ დაეთახმა და "ახირება" უწოდა.