"მოგესალმებით, ივანიშვილის საბოლოოდ აწყვეტასთან დაკავშირებით", — ასე გამოეხმაურა საქართველოს მესამე პრეზიდენტი, მიხეილ სააკაშვილი ნაციონალური მოძრაობის მმართველობის პერიოდში თავდაცვის მინისტრის ირაკლი ოქრუაშვილის დაკავებას.

მიხეილ სააკაშვილის თქმით, ივანიშვილმა დააკავა "მისი მთავარი ცრუ მოწმე სააკაშვილის პროცესებზე, მერაბიშვილის წინააღმდეგ პროცესებზე, სხვა პოლიტიკურ პროცესებზე".

"ოქრუაშვილმა გადათქვა თავისი ჩვენება, სულ სხვა რამეების საუბარი დაიწყო და ღიად დაუპირისპირდა ივანიშვილს. მანამდე ნახეთ, რასაც აკეთებდა ხაზარაძეზე, ნახეთ დღეს რაც ქნეს ეკა კვესიტაძეზე. თუ მან 2012 წელს მოახდინა რეიდერული შეტევა და ხელისუფლების რეიდერული ხელში ჩაგდება, ახლა ხდება თითოეული ქართველის ცხოვრების რეიდერული ხელში ჩაგდება. ეს არის ჩვეულებრივი ბეზპრედელშიკი რეიდერი, რომელიც ბოლომდე ახდენს ქართული ცხოვრების ყველა ასპექტის მონოპოლიზაციას და ჯიბეში ჩაგდებას", — განაცხადა მიხეილ სააკაშვილმა.

მისი თქმით, ეს არის ტესტი "ვართ თუ არა ერი, გვაქვს თუ არა თავმოყვარეობა, ღირსება, თუ ვართ ერთი ბინძური ოლიგარქის დასაჩაგრი, გასანადგურებელი". ის მზად არის საბრძოლველად.

"დარწმუნებული ვარ, საქართველოში ძალიან ბევრია მზად საბრძოლველად და ჩვენ ვიბრძვით ბოლომდე. ვინც ყვება ზღაპრებს, რომ თურმე ჩვენ ყველა ნორმა უნდა დავიცვათ, კანონის ყველა წესით უნდა ვიმოძრაოთ და ამან ყველაფერი უნდა დაარღვიოს, არის აბსოლუტურად სულელი და ივანიშვილის სასარგებლო იდიოტი, რადგან ყველა დიდი წარმატება დასავლეთში, ევროპულ ცივილიზაციაში, დემოკრატიაში ხდებოდა კონკრეტული ადამიანების მიერ არსებული წყობილების წინააღმდეგ, კონკრეტული ქმედებებით", — ამბობს სააკაშვილი.

სააკაშვილის თქმით, ივანიშვილი ცდილობს, აგვისტოს ბოლომდე "გააიასნოს ტელევიზიის საკითხი, მოწმინდოს მთლიანად პოლიტიკური ველი, ყველაფერი ჩაიგდოს ბოლომდე ხელში და ქვეყნის რეიდერული ხელში ჩაგდება დაასრულოს".

"არ გამოუვა! არ გამოგივა, ხიხო. არ გამოგივა ბეზპრედელშიკო“. შენი მმართველობა ძალიან სწრაფად დასრულდება. ძალიან აჩქარებ მოვლენებს და კარგი, რახან აჩქარებ, მაშინ გამოწვევა მიღებულია. ჩვენც დაგიჩქარებთ, ჩვენც დაგიძაბავთ, ჩვენც მოგხედავთ სათანადო დონეზე. აბა, თქვენ იცით", — ამბობს სააკაშვილი.

შინაგან საქმეთა სამინისტრომ 20 ივნისის საქმეზე ყოფილი თავდაცვის მინისტრი ირაკლი ოქრუაშვილი და კიდევ 4 პირი დააკავა. დაკავებულებს ბრალად ჯგუფური ძალადობა ედებათ. 20 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში მიცემულია 17 პირი, მათ შორის პარლამენტის წევრი — ნიკანორ მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში.