eZo უკვე მეხუთე წელია, სტუმრებს კარგ მუსიკას, კომფორტულ გარემოსა და ვიზუალურად შთამბეჭდავ სანახაობას სთავაზობს, თუმცა ამ კომპონენტების გარდა, ფესტივალი სხვა ღირებულებებზეც დგას. მათ შორის ერთ-ერთი ყველაზე მნიშვნელოვანი ბუნებასთან ჰარმონიული ურთიერთობაა.

ბევრმა ჩვენგანმა შეიძლება არ იცოდეს, მაგრამ იმ ჯადოსნურ ადგილას, სადაც ეზო იმართება, არც ერთი ხე არ მოჭრილა. არსებული ინფრასტრუქტურა გარემოს გათვალისწინებით მოეწყო, ფესტივალის ტერიტორიის კიდევ უფრო გამწვანებაზე კი ეზოს მებაღეები ყოველდღიურ რეჟიმში მუშაობენ.

წელს ეზო პირველი ფესტივალი გახდა, რომელიც USAID WMTR II Program-აში ჩაერთო და ნარჩენების გადამუშავება დაიწყო.

შედეგი უკვე ხელშესახებია: ტერიტორიაზე განთავსებული სპეციალური ურნებიდან ფესტივალის დახურვის ღონისძიებაზე 6000-მდე პლასტმასის ბოთლი შეგროვდა და გაიგზავნა გადასამუშავებლად.

რა თქმა უნდა, მხოლოდ ბოთლების გადამუშავება არ კმარა. ეზოს კაფეში ასევე არ გამოყენებულა პლასტმასის თეფშები, რამაც საგრძნობლად შეამცირა კომუნაში გამოყენებული ნარჩენების რაოდენობა. მეტალის საწრუპები, მრავალჯერადი გამოყენების ჭიქები თუ ხის ჩანგლები - ეს მცირე ჩამონათვალია იმ სიახლეებისა, რომელთაც ფესტივალის ახალ სეზონზე უნდა ველოდოთ.

ასე რომ, ეზოს აფთერ-ფართიზე, 26 ივლისს მისულს უკვე გეცოდინებათ, რომ თქვენ მიერ გადაგდებული პლასტმასის ბოთლი არავის მოუტანს ზიანს.

კომუნა მზესუმზირის წევრები დარწმუნებული არიან, რომ ამ ინიციატივას უამრავი მხარდამჭერი ეყოლება და ეზოს სტუმრები ერთად შექმნიან გარემოს, სადაც ბუნებაზე ზრუნვა გართობისა და დასვენების განუყოფელი კომპონენტია.