საზოგადოებრივი მაუწყებლის ეთერში დებატებში მონაწილეობის დროს, გოგი თოფაძემ ქართული ოცნების და ნაციონალური მოძრაობის მხრიდან დებატებში არ ჩართვა უპატივცემულობად შეაფასა:

"წინასაარჩევნოდ უნდა შევხვდეთ და ჩვენი აზრები გამოვთქვათ, კომპრომისები გამოვნახოთ და ყველამ ერთად მოვუყვეთ ხალხს, რას ვაპირებთ და როგორ ვაპირებთ".

გოგი თოფაძემ დასძინა, რომ მის პარტიას აქვს ერთი და იგივე გეზი 1999 წლიდან, ასე რომ ის მაყურებელს ახალ პროგრამას არ მოახსენებს:

"ჩვენ რაც მოვედით 1999 წელს პოლიტიკაში, გვაქვს ერთი და იგივე გეზი და ვთვლით, რომ ეს არის ერთადერთი სწორი გზა, საქართველოს ამ სიდუხჭირიდან გამოყვანა, ჩვენი მოსახლეობის ღირსეული ცხოვრების შექმნა და ის პრობლემა, რომელიც მილიონნახევარი ქართველი გასაქცევად გავამზადეთ და სამწუხაროდ მათი დაბრუნება მხოლოდ და მხოლოდ ძლიერი ეკონომიკის, ძლიერი სოფლის მეურნეობის და მთელი რიგი სხვა დარგების აღორძინებით შეიძლება მოხდეს. ეს მილიონნახევარი ქართველი დამამცირებელ შრომას ეწევა უცხოეთში და ისინი რომ დავაბრუნოთ, ერთადერთი პროგრამა მიმაჩნია ის, რასაც ვამბობთ 1999 წლიდან. ნაკლები დავუჯეროთ ჩვენს უცხოელ მრჩეველებს, ის ტრაგედია რაც დატრიალდა საქართველოში 1990 წლების შემდეგ, დაჟინებით მოთხოვნა იყო, რომ ჩვენ არ უნდა გვქონდეს მრეწველობა, ინდუსტრია და სოფლის მეურნეობა. ჩვენ ისე ჩამოვრჩით თანამედროვე ტექნოლოგიებს, რომ ჩვენ უნდა გავატაროთ მხოლოდ და მხოლოდ ნავთობსადენი და სატრანსპორტო კორიდორი ვიყოთ და ტურიზმით ვიცხოვროთ. ამ გზით რომ წაიყვანა ქვეყანა წინა ხელისუფლებამ, სწორედ ამიტომ არის ქვეყანა სავალალო მდგომარეობაში".