სამოქალაქო პროტესტი #სირცხვილია უკვე ერთი თვეა, გრძელდება. ერთი თვის თავზე რუსთაველის გამზირზე საპროტესტო პოსტერები გამოჩნდა, რომლებზეც "ერთი თვეა, ცალი თვალით გიყურებ" წერია.

დღეს, საქართველოს პარლამენტთან აქცია #სირცხვილიას ორგანიზატორები და მხარდამჭერები ისევ, პროტესტის დაწყებიდან ერთი თვის თავზე შეიკრიბებიან. ისინი მოუწოდებენ ადამიანებს გამოვიდნენ "ქვეყნის სამსახურში" ნებისმიერ ადგილსა და ნებისმიერი ფორმით, 19:00-დან.

#სირცხვილიას ერთი თვის თავზე აქციასთან დაკავშირებით განცხადებას ავრცელებენ:

"1 თვის წინ, შს მინისტრმა, გიორგი გახარიამ, მთავრობის უმოქმედობისა და ოკუპაციის წინააღმდეგ გამოსული ადამიანების დარბევის ბრძანება გასცა. შედეგად, მივიღეთ დასახიჩრებული მშვიდობიანი დემონსტრანტები, მედიის თანამშრომლები და ადამიანები, რომლებსაც სახლამდე სდიეს, სახეში აფურთხეს, მიჯრით ესროლეს და სცემეს.

1 თვის წინ, საქართველოს ხელისუფლებამ, შს მინისტრ, გიორგი გახარიას ბრძანებით, გაუფრთხილებლად, ყოველგვარი წესის დარღვევითა და არაპროპორციული ძალის გამოყენებით ტყვიები დაუშინა თავის მოქალაქეებს, მათ შორის, 18 წლის მაკო გომურსაც, რომელმაც, სამწუხაროდ, თვალი დაკარგა.

1 თვეა, რაც სხვადასხვა ქალაქსა თუ სოფელში, ადამიანები სხვადასხვა ფორმით ითხოვენ, აიღოს პოლიტიკური პასუხისმგებლობა გიორგი გახარიამ და დატოვოს თანამდებობა.

ბიძინა ივანიშვილი კი თვლის, რომ ახალგაზრდებისთვის თვალის ამომთხრელი მინისტრი გმირი და "მაგარი კაცია", — ვკითხულობთ დღევანდელი აქციის აღწერაში.