რუსთავი 2-ის ახალდანიშნული დირექტორი პაატა სალია კომპანიაში საერთაშორისო აუდიტის ჩატარებას გეგმავს. მისი თქმით, გარკვეული საკითხების გარკვევასა და ინფორმაციის მიღებაში ახალი მფლობელის, ქიბარ ხალვაშის კონსულტანტი დაეხმარება.

"გვინდა მოვამზადოთ კომპანიაში არსებული ინფორმაცია იმისთვის, რომ ჩატარდეს კვალიფიციური აუდიტი საერთაშორისოა კომპანიის მიერ", — განუცხადა მან რუსთავი 2-ს.

პაატა სალია რუსთავი 2-ში დირექტორის სტატუსით დღეს მეორედ მივიდა. ის საფინანსო და ადამიანური რესურსების მართვის დეპარტამენტის ხელმძღვანელებს შეხვდა.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. ახლა რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა.