ახალ ფილმში დენიელ კრეიგი ჯეიმს ბონდის როლს ისევ შეასრულებს, თუმცა რადგანაც მან ორგანიზაცია M16 დატოვა, მისი კოდური ნომერი - 007 ახლა უკვე სხვისი საკუთრებაა. როგორც ცნობილია, ახალი 007-ის როლისთვის ბრიტანელი შავკანიანი ქალი მსახიობი - ლაშანა ლინჩი შეარჩიეს.

25-ე ფილმში ჩვენთვის კარგად ნაცნობი აგენტი სამსახურიდან წამოსულია და იამაიკაზე ცხოვრობს, თუმცა მისი დახმარება მაინც საჭირო ხდება და ახალ ბოროტმოქმედთან იწყებს ბრძოლას.

"ახალ ფილმში არის სცენა, სადაც M ამბობს - "შემოდი 007" და ლაშანა შემოდის, რომელიც შავკანიანი ლამაზი ქალია. შოკისმომგვრელი მომენტია. ბონდი ისევ ბონდია, თუმცა როგორც 007 ჩაანაცვლეს", — წერს ანონიმური ავტორი, რომელიც ახალ ფილმზე ინფორმაციას ავრცელებს.

ლაშანა ლინჩი დასავლეთ ლონდონელი, 31 წლის მსახიობია, რომელიც მაყურებელმა კინოში პირველად 2012 წელს გამოსულ Fast Girls-ში გაიცნო. თუმცა მისი ყველაზე მნიშვნელოვანი როლი წელს ვნახეთ ეკრანებზე, როდესაც Captain Marvel-ში ქეროლ დენვერსის მეწყვილე პილოტის როლი შეასრულა.