ვარიანში, იაკობ გოგებაშვილის სახლ-მუზეუმში მიმდინარე ღონისძიების პარალელურად #სირცხვილიას ორგანიზატორებისა და მხარდამჭერების ნაწილმა აქცია გამართა. ვარიანში ამ დროს საქართველოს პრემიერ-მინისტრი მამუკა ბახტაძე იმყოფებოდა.

აქციის მონაწილეები პრემიერს ტრანსფრანტებით დახვდნენ და 20 ივნისის ღამის გამო პროტესტს ახვეული თვალით გამოხატავდნენ. ისინი საქართველოს პრემიერს, შინაგან საქმეთა მინისტრის დაუყოვნებლივ გადაყენებასა და ყველა იმ პირის დასჯას სთხოვენ, ვინც 20 ივნისის სისხლიან დარბევაში მონაწილეობა მიიღო. აქციის მონაწილეებმა საქართველოს ჰიმნიც შეასრულეს.

ფოტო: თამარ კურატიშვილი

მოგვიანებით, პრემიერმა თქვა: "ნაციონალურ მოძრაობას სურს, საკითხი წარმოაჩინოს შემდეგნაირად: პარლამენტის შტურმი თურმე პატრიოტიზმის გამოვლინებაა და კონსტიტუციისა და ინსტიტუტების დაცვა — ბოროტება". მისივე თქმით, სამართლებრივ სახელმწიფოში მსგავსი ქმედებები, რაც 20-21 ივნისს საზოგადოებამ იხილა, დაუშვებელია და მას სამართლებრივი შეფასება მიეცემა.

პირველი შემთხვევა არ არის, როცა #სირცხვილიას მხარდამჭერები მთავრობის წევრებს სხვადასხვა ღონისძიების პარალელურად აქციებს უწყობენ და შს მინისტრის გიორგი გახარიას გადადგომას მოითხოვენ. ბათუმში, საერთაშორისო დონის კონფერენცია საპროტესტო აქციების ფონზე დაიწყო და დასრულდა.

აქცია #სირცხვილია და 20 ივნისის აქცია

საქართველოში ანტისაოკუპაციო აქციები #სირცხვილია 26-ე დღეა მიმდინარეობს. სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

პარლამენტის თავმჯდომარის გადადგომას წინ უსწრებდა 20 ივნისის ღამე, როცა შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა, ერთ-ერთი კი ამ დრომდე კომატოზურ მდგომარეობაში, სამედიცინო დაწესებულებაში რჩება. შედეგად, აქციები ამ დრომდე გრძელდება შინაგან საქმეთა მინისტრის გიორგი გახარიას გადაგომის მოთხოვნით.

20-21 ივნისის მოვლენებს საქართველოს პროკურატურა სახელმწიფო გადატრიალების მუხლით იძიებს.