20:30-ის ინფორმაციით, შალვა რამიშვილისა და ბესო კალაძის მიერ ნოტარიუსთან დალუქული GFK-ს კვლევის თანახმად, ერთიან ნაციონალურ მოძრაობას მხარს გამოკითხულთა მხოლოდ 12,5 პროცენტი და არა 26 პროცენტი უჭერს, როგორც ეს რუსთავი 2-მა გაავრცელა. რაც შეეხება ქართულ ოცნებას, კვლევის რეალური და არხის მიერ გავრცელებული შედეგები (25,4 პროცენტი) ერთმანეთს ემთხვევა.

რაც შეეხება ამავე კვლევაში ქართულ ოცნებასთან მიმართებით არსებულ მონაცემებს, არხის მიერ გამოქვეყნებული რიცხვები კვლევის რეალური შედეგების მონაცემებს ემთხვევა. რამიშვილი ამბობს, რომ ის კომუნიკაციების მარეგულირებელ ეროვნულ კომისიაში მისვლასა და განცხადების შეტანას გეგმავს:

"კომუნიკაციების მარეგულირებელ კომისიაში შევიტან განცხადებას, რომ მოახდინონ რეაგირება. არსებობს მეორე ნოტარიუსთან, ნანა ბაკურაძესთან შენახული ფლეშმეხსიერების ბარათი, სადაც არის ველი კვლევის. ამასაც გადავცემთ კომპეტენტურ პირებს. უნდა დამთავრდეს ინსინუაციები კვლევებთან დაკავშირებით".

დღეს შალვა რამიშვილმა და თავისუფალი ზონის ყოფილმა წევრმა, ბესო კალაძემ საგანგებო ბრიფინგი გამართეს, რომელზეც განმარტეს, რომ რუსთავი 2 საზოგადოებრივი აზრის გამოკითხვის გაყალბებულ შედეგებს ასაჯაროვებს.