ჟურნალისტი შალვა რამიშვილი აცხადებს, რომ საზოგადოებრივი აზრის კვლევები, რომელსაც რუსთავი 2 VCG-სა და GFK-ზე დაყრდნობით ასაჯაროებს, გაყალბებულია და კვლევის რეალურ შედეგებს არ ასახავს. მისი თქმით, არხის მიერ გამოქვეყნებული კვლევის შედეგები რამდენიმე პარტიასთან, მათ შორის ენმ-სთან მიმართებით, გაყალბებულია.

რამიშვილი განმარტავს, რომ 28 სექტემბერს მას თავისუფალი ზონის ყოფილმა წევრმა, ბესო კალაძემ აჩვენა 2 დოკუმენტი და ფლეშკა:

"ერთ დოკუმენტში იყო გაყალბებული მონაცემები, რომლებიც არ იყო გამოქვეყნებული და თუ არ ვცდები, რუსთავი 2-მა კვირას გამოაქვეყნა. მეორეში კი რეალური მონაცემები".

მისი თქმით, მან ურჩია თავისუფალი ზონის წევრს, დალოდებოდა რუსთავი 2-ის მიერ კვლევის შედეგების გასაჯაროებას და მხოლოდ ამის შემდეგ ეთქვა, რომ მას ეს დოკუმენტების წინასწარ ჰქონდა.

რამიშვილის რჩევით, 28 სექტემბერს კალაძემ აღნიშნული დოკუმენტები და ფლეშკა ნოტარიუსთან დასალუქად მიიტანა, რომელიც დღეს ჟურნალისტების თანდასწრებით გახსნა.

ჟურნალისტების შეკითხვას, ვინ მიაწოდა კალაძეს აღნიშნული საბუთები, მან უპასუხა, რომ წყაროს სახელსა და გვარს ვერ დაასახელებდა.

2 ოქტომბერს შალვა რამიშვილმა საგანგებო ბრიფინგი დააანონსა და განაცხადა, რომ წინასაარჩევნოდ საზოგადოებას მნიშვნელოვან ინფორმაციას მიაწვდიდა, რომელიც არჩევნების შედეგებზე გავლენას იქონიებდა:

"მეგობრებო, მე მაქვს ისეთი ინფორმაცია, რომელიც მნიშვნელოვან გავლენას მოახდენს წინასაარჩევნო გარემოზე. ინფო არის სენსაციური! ხვალ დილით, 10 საათზე პრესკონფერენციაზე საჯაროდ მოგახსენებთ თუ რა ხდება".