გიორგი გაბუნიას მიერ პირდაპირ ეთერში რუსეთის პრეზიდენტისა და მისი გარდაცვლილი მშობლების გინება, საქართველოს ექსპრეზიდენტმა მიხეილ სააკაშვილმაც დაგმო. მისი თქმით, ეპატაჟი და ისტერიულობა საქმეს აზარალებს.

"რუსულ იმპერიალიზმთან და ოკუპაციასთან ბრძოლისას ჩვენი მედია ისტერიულ რუსულ მედიას არ უნდა დაემსგავსოს! ჩვენ მხარეზეა სიმართლე და სიმართლის გადმოცემა საჭიროა ცივილიზებული ფორმით!" — დაპოსტა მან ფეისბუქგვერდზე.

გაბუნიას არაეთიკური და შეურაცხმყოფელი ქცევა კატეგორიულად დაუშვებლად მიიჩნია არხმაც. მთავრობის წარმომადგენლებმა კი ეს ქვეყნის წინააღმდეგ ომად შეაფასეს.

კახა კალაძემ თქვა, რომ ამას მკაცრი რეაგირება უნდა მოყვეს და ქვეყანისთვის საფრთხის შექმნას არ დაუშვებენ. მსგავსი შინაარსის განცხადებები ჰქონდათ პრემიერ-მინისტრსა და პარლამენტის თავმჯდომარესაც. ორივე მათგანმა აღნიშნა, რომ გაბუნიას გინება საფრთხეს ქმნის და ქვეყნის მტრობაა.

რუსთავი 2-მა დაუშვებლად მიიჩნია გაბუნიას ქცევა და გაემიჯნა. აქვე, არხი აღნიშნავს, რომ პოლიტიკოსების მსგავსი შეფასებები სარედაქციო პოლიტიკაში ჩარევაა.

გაბუნიას მიმართვა უკვე შეაფასა ეთიკის ქარტიამაც. საბჭოს განცხადებით, ეს არაეთიკური განცხადებები აღვივებს ხელისუფლების მისწრაფებებს შეზღუდოს გამოხატვის თავისუფლება.

გაბუნიას გინება ეთერში და არხის პოზიცია

რუსთავი 2-ის გადაცემა P.S.-ის წამყვანმა, გიორგი გაბუნიამ რუსეთის ფედერაციის პრეზიდენტს, ვლადიმერ პუტინს აგინა. რუსულენოვან მიმართვაში მან არაეთიკურად და შეურაცხმყოფლად მოიხსენია პუტინის გარდაცვლილი დედაც. გენერალურმა დირექტორმა, ნიკა გვარამიამ კვირის აქცენტების სპეციალურ ეთერში განაცხადა, რომ მომხდარი კატეორიულად დაუშვებელი და მიუღებელია. არხი კატეგორიულად არ იზიარებს მსგავს დამოკიდებულებას.

გვარამიამ განმარტა, რომ არხი კატეგორიულად არ იზიარებს გამოხატვის მსგავს ფორმას, მიუხედავად იმისა, რომ იზიარებენ გიორგი გაბუნიას აზრს. მისი თქმით, ეს ქცევა არ შეესაბამება არხის სარედაქციო პოლიტიკას ადა მაღალ სტანდარტს.

გვარამიას განცხადებით, გამოხატვის მაღალი თავისუფლება, რომელსაც რუსთავი 2 ანიჭებს მასთან დასაქმებულს, მაღალ პასუხისმებლობასაც ითვალისწინებს. მისი თქმით, მომხდარს ტელევიზიის თვითრეგულირება განიხილავს.