აქციაზე #სირცხვილია კოტე ყუბანეიშვილი გამოეხმაურა ქეთათო პოპიაშვილის განცხადებას ირაკლი ჩარკვიანის მუსიკის გამოყენების შესახებ.

"მეტი რა საავტორო უფლება უნდა მოითხოვო, როდესაც შვილიშვილების თაობა შენს სიმღერას იმღერებს. როგორ შეიძლება, რომ ამაში რამე მოითხოვო, არ ვიცი, რა", — განაცხადა მან.

ქეთათო პოპიაშვილმა აქცია #სირცხვილიაზე ირაკლი ჩარკვიანის შემოქმედების გამოყენება გააკრიტიკა და ორგანიზატორებს "მაჯლაჯუნა მიმტაცებლები უწოდა". მისი თქმით, ირაკლის სიმღერა ზედმეტად აღმატებულია იმისთვის, რომ ერთი პოლიტიკოსისადმი პროტესტს უკავშირდებოდეს. ქეთათო ფიქრობს, რომ გრძელვადიან პროტესტში დღეში რამდენჯერმე ჩარკვიანის "საქართველოს" ჩართვით, ირაკლის სახელი გაუფასურდება.

ქეთათოს კრიტიკის მიუხედავად, აქციებზე ჩარკვიანის შემოქმედება მაინც ჟღერდება. 4 ივლისის აქციაზე ჩარკვიანის სიმღერები შეასრულეს ზურა ჯავახიამ და ანი სუბელიანმა. სუბელიანმა სიმღერის შესრულებამდე განაცხადა, რომ მეფის შემოქმედება ყველასია.

საავტორო უფლებები

ირაკლი ჩარკვიანის გარდაცვალების შემდეგ, მის შემოქმედებაზე საავტორო უფლებები ცოლს გადაეცა. ეს პირველი შემთხვევა არაა, რაც ქეთათო ირაკლი ჩარკვიანის სიმღერების გამოყენებას საჯაროდ აპროტესტებს. 2017 წლის ბოლოს, მუსიკის კოლექციონერ ჯაბა შავიშვილს, მიღებული რეპორტის გამო YouTube-ის არხი წაუშალეს, სადაც ჩარკვიანის გარდა, ათასზე მეტი ქართული კომპოზიცია ჰქონდა განთავსებული. მაშინ შავიშვილი წერდა, რომ მის იუთუბ არხზე არსებული სიმღერების დიდი ნაწილის ასლი არ არსებობდა.

"საქმე იმაშია, რომ კეთდება ირაკლის და ჩემი ოფიციალური არხი იუთუბზე, MepeKetato Official, სადაც აიტვირთება ყველა მასალა, რაც გამოვეცით ირაკლის სიცოცხლეში და მისი გარდაცვალების შემდგომ, ხოლო იუთუბის ყველა სხვა არხზე მასალა განთავსდება მხოლოდ ჩემი თანხმობით, ვინაიდან მე ვარ საავტორო უფლების მფლობელი", — დაწერა ქეთათომ საპასუხოდ.