რამდენიმე დღის წინ, მომღერალმა ქეთათომ სირცხვილიას აქციებზე ირაკლი ჩარკვიანის მუსიკის გაჟღერება გააკრიტიკა და თქვა, რომ ოკუპაციის გაპროტესტებისას სხვისი საავტორო უფლებების "მაჯლაჯუნა მიმტაცებელი" არ უნდა იყო.

ამჯერად ქეთათო წერს, რომ სწორი იყო, როდესაც მომიტინგეების გადამეტებული ძალით დაშლის შემდეგ, სირცხვილიას აქციებზე ჩარკვიანის შემოქმედება ჩართეს:

"აქციების დასაწყისში, როცა მუსიკა ძალადობის საპასუხოდ გაჩენილი მუხტის ასამაღლებლად იყო გამოყენებული, როდესაც საკუთარი ღირსების დასაცავად გამოსულ ხალხს ნადირის ტყვიებით დამიზნებით უმასპინძლდებოდნენ, როდესაც არაერთი უდანაშაულო ადამიანი დაშავდა და როდესაც დაჩოქილ და ხელებაწეულ დემონსტრანტებს გადაუარეს, მაშინ სხვა რა, თუ არა "საქართველო?!" სხვა ვინ, თუ არ ირაკლი?!"

თუმცა ის დასძენს, რომ გრძელვადიან პროტესტში მას ზედმეტად ეჩვენება დღეში რამდენჯერმე ჩარკვიანის "საქართველოს" აქციაზე ჩართვა. ის მიიჩნევს, რომ ასე ირაკლის სახელი გაუფასურდება:

"ირაკლი ჩარკვიანის შემოქმედება ზედმეტად აღმატებულია იმისთვის, რომ მხოლოდ პოლიტიკოსების სახელებთან, მათ პოლიტსივრციდან გაძევებასთან, ან მათ აღზევებასთან იყოს დაკავშირებული, პოლიტიკოსების, რომლებიც თუ შევლენ ისტორიაში, არამგონია კარგი კვალი დატოვონ და ნამდვილად არ მინდა ამ დროებით სახელებთან ეს მართალი და მრავლისმთქმელი მუსიკა ასოცირდებოდეს. ხალხს ირაკლის ხმაზე მხოლოდ მოძალადე რეჟიმები და ამ რეჟიმების მოძალადე მმართველები არ უნდა აგონდებოდეს".

ქეთათო ამბობს, რომ პირადად იცნობს აქციების ორგანიზატორებს. ის დასძენს, რომ ანტისაოკუპაციო გამოსვლებისას არაერთხელ დაკავშირებიან და სიტყვიერი თანხმობით, უფასოდ შეთანხმებულად ირაკლი ჩარკვიანის კომპოზიციის გაშვებაზე.

თუმცა, როგორც ჩანს, ამ ჯერზე მისთვის თანხმობა არ უთხოვიათ, რის შემდეგაც ქეთათოს სიტყვებით, ის ერთ-ერთ ორგანიზატორს დაუკავშირდა და სთხოვა, აღარ გაეშვათ კომპოზიციები.

"რისი მოთხოვნის — არადა, მე თხოვნით მივმართე, — როგორც მორალური, აგრეთვე სამართლებრივი უფლება მაქვს. არ უნდა ავყვეთ პროვოკაციებს, არ გვინდა ნეგატივის კულტივირება, საკმაოდ რთული, ეკლიანი გზა გვაქვს გასავლელი მთავარ მიზნამდე. მე მჯერა, რომ - ჩვენ მოვიგებთ ომს!" — წერს ქეთათო ფეისბუქზე.

ქეთათოს კრიტიკის მიუხედავად, აქციებზე ჩარკვიანის შემოქმედება მაინც ჟღერდება. 4 ივლისის აქციაზე ჩარკვიანის სიმღერები შეასრულეს ზურა ჯავახიამ და ანი სუბელიანმა. სუბელიანმა სიმღერის შესრულებამდე განაცხადა, რომ მეფის შემოქმედება ყველასია.

საავტორო უფლებები

ირაკლი ჩარკვიანის გარდაცვალების შემდეგ, მის შემოქმედებაზე საავტორო უფლებები ცოლს გადაეცა. ეს პირველი შემთხვევა არაა, რაც ქეთათო ირაკლი ჩარკვიანის სიმღერების გამოყენებას საჯაროდ აპროტესტებს. 2017 წლის ბოლოს, მუსიკის კოლექციონერ ჯაბა შავიშვილს, მიღებული რეპორტის გამო YouTube-ის არხი წაუშალეს, სადაც ჩარკვიანის გარდა, ათასზე მეტი ქართული კომპოზიცია ჰქონდა განთავსებული. მაშინ შავიშვილი წერდა, რომ მის იუთუბ არხზე არსებული სიმღერების დიდი ნაწილის ასლი არ არსებობდა.

"საქმე იმაშია, რომ კეთდება ირაკლის და ჩემი ოფიციალური არხი იუთუბზე, MepeKetato Official, სადაც აიტვირთება ყველა მასალა, რაც გამოვეცით ირაკლის სიცოცხლეში და მისი გარდაცვალების შემდგომ, ხოლო იუთუბის ყველა სხვა არხზე მასალა განთავსდება მხოლოდ ჩემი თანხმობით, ვინაიდან მე ვარ საავტორო უფლების მფლობელი", — დაწერა ქეთათომ საპასუხოდ.

20 ივნისის აქცია

რუსი დეპუტატის, სერგეი გავრილოვის მიერ სკამის დაკავებას საპროტესტო ტალღა მოჰყვა პარლამენტის წინ. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას.

აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი.

შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა. საქმეზე გამოძიება სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს.