ბრაზილიური მუსიკალური ჟანრის, ბოსა-ნოვას ერთ-ერთი არქიტექტორი, ლეგენდარული მუსიკოსი ჟუან ჟილბერტუ 88 წლის ასაკში გარდაიცვალა.

ბრაზილიური მუსიკის მკვლევარების მიერ ჟილბერტუ აღიარებულია, როგორც ბოსა-ნოვას პირველი შემსრულებელი. სტილისა, რომელმაც ბრაზილიური მუსიკალური იდენტობა მნიშვნელოვანწილად განსაზღვრა. მისი ინტიმური და ნიუანსირებული შესრულების ტექნიკა, როგორც კრიტიკოსები ამბობენ, 50-იან წლებში მისმა საცხოვრებელმა პირობებმა გამოიწვია, რადგან დაკვრის და სიმღერის დროს მას არ უნდოდა ოჯახი შეეწუხებინა. ამის გამო, მას მუსიკალური მიდრეკილებების დაკმაყოფილება სააბაზანოში უწევდა.

1962 წელს, ამერიკელმა ჯაზ-საქსოფონისტმა, სტენ გეტსმა ჟილბერტუს მოუსმინა და ერთობლივ ალბომზე სამუშაოდ დაპატიჟა. შედეგად, მათი ერთობლივი ნამუშევარი Getz/Gilberto ერთ-ერთ ყველაზე გაყიდვად ჯაზ ალბომად იქცა და 1965 წლის საუკეთესო ალბომის კატეგორიაში გრემიც მოიპოვა. სწორედ ამ ალბომშია შესული მისი ერთ-ერთი ყველაზე პოპულარული სიმღერა Girl From Ipanema, სადაც ქალის ვოკალურ პარტიას მისი მეუღლე, ასტრიდ ჟილბერტუ ასრულებს. აღსანიშნავია, რომ ამ სიმღერამ ცალკე დაიმსახურა გრემი, კატეგორიაში "საუკეთესო ჩანაწერი".

ჟუან ჟილბერტუ სიცოცხლის ბოლო წლებამდე ასრულებდა მუსიკას და ის ერთ-ერთ ყველაზე გავლენიან შემოქმედად ყველა თაობის მუსიკოსების მიერაა აღიარებული.