პარლამენტის თავმდჯომარე, არჩილ თალაკვაძე ამბობს, რომ 20 ივნისს გიორგი გახარიას პოლიტიკური პასუხისმგებლობა იყო დაეცვა საზოგადოება ძალადობრივი სცენარისგან და პარლამენტი ძალადობრივი შეჭრისგან დაეცვა.

"ეს არის მისი, როგორც მინისტრის პოლიტიკური პასუხისმგებლობა", — ამის შესახებ არჩილ თალაკვაძემ გადაცემა რეაქციაში განაცხადა.

მისი თქმით, თუ სამართალდამცავებმა მოქალაქეების წინააღმდეგ არაპროპორციული ძალა გამოიყენეს, გიორგი გახარიას პასუხისმგებლობაა, ჩატარდეს გამოძიება და მიღებულ იქნას კონკრეტული ზომები.

20 ივნისის აქცია

რუსი დეპუტატის, სერგეი გავრილოვის მიერ სკამის დაკავებას საპროტესტო ტალღა მოჰყვა პარლამენტის წინ. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას.

აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი.

შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა. საქმეზე გამოძიება სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს.

ამავე თემაზე: