დრო რომ სწრაფად გადის, ხომ გახსოვთ? ჯერ ერთი, 2019 წლის ნახევარი უკვე მიიწურა (საკუთარი თავისთვის მიცემული რამდენი დაპირება შეასრულეთ ამ დროში?) და მეორეც: თითქოს გუშინ ვწერდით ეზოს ფესტივალის დაწყებაზე, 13 ივლისს კი უკვე მისი დახურვის საზეიმო ცერემონია გაიმართება. რას ვიზამთ, ყველაფერი, რაც კარგია, ლიმიტირებულია. მათ შორის, ასეთი საღამოებიც და მათზე დასასწრები ბილეთებიც.

13 ივლისს ეზოზე გასართობად ასულ ადამიანებს და, ამ სტატიის ავტორსაც, უსერიოზულესი ამბავი დახვდებათ ადგილზე. ორი დერიკი: დერიკ მეი და დერიკ კარტერი ეცდებიან, ელექტრონული მუსიკის სათავეებთან დაგვაბრუნონ და გაგვახსენონ, ის რაც მთავარია: მეგობრობა, ცეკვა, თავისუფლება.

Derrick May

დერიკ მეი ელექტრონული მუსიკის ისტორიაში ერთ-ერთი ყველაზე გავლენიანი ადამიანია, რადგან ის, რასაც ამჟამად ტექნოს ვუწოდებთ, მის გარეშე ამ ფორმით ვერ იარსებებდა.

მეი 1963 წელს, დეტროიტში დაიბადა. როცა თინეიჯერი იყო, ტექნოს სხვა მამებს, ხუან ატკინსსა და კევინ საუნდერსონს შეხვდა. ევროპული ელექტრონული მუსიკისა და აფროამერიკული საცეკვაო რიტმების შეზავებით ატკინსმა, მეიმ და საუნდერსონმა შექმნეს სტილი, რომელიც ერთდროულად ფუტურისტული და ემოციური იყო. მაშინ, რა თქმა უნდა, არც ერთმა არ იცოდა, რომ გარდატეხის სათავეში იდგნენ.

მეის ადრეული ჩანაწერები Nude Photo, The Dance, Strings of Life და Illusion სამი დეკადის შემდეგაც კი არ კარგავს თანამედროვეობას. სწორედ მისმა ხედვამ გამოიწვია ევროპაში რეივის აფეთქება 80-იანების ბოლოს, მეი კი მოთხოვნად მუსიკოსად აქცია. მისი ლეიბლი Transmat 1986 წელს შეიქმნა, რამაც თავის მხრივ, დეტროიტულ ტექნოს განვითარების ახალი გზა გაუხსნა.

დერიკ მეი ამჟამად ინსპირაციას კლასიკურ მუსიკაში პოულობს, თუმცა როგორ განწყობას შემატებს ის ეზოს ფესტივალს, ეს ადგილზე უნდა მოისმინოთ.

Derrick Carter

როგორც Resident Advisor წერს, დერიკ კარტერი ქმნის მუსიკას, ცეკვავს, მღერის და გატაცებულია ფეხსაცმელებით. ყოველ შემთხვევაში მის ინსტაგრამზე ერთი შეხედვაც კი ამ წინადადების სისწორეში დაგარწმუნებთ.

ფირფიტებზე დაკვრა 9 წლის ასაკში, ოჯახურ შეკრებებზე დაიწყო, თინეიჯერობის ასაკში კი ჩიკაგოს ჰაუსის სცენის ერთ-ერთი პიონერი გახდა. ის, რაც სხვა დიჯეებისგან გამოარჩევდა, ექსპერიმენტების სიყვარული იყო. 1987 წელს სადებიუტო სინგლი Love Me Right გამოუშვა და მას შემდეგ არ გაჩერებულა.

თვითონ ამბობს, რომ ყველაზე მეტად ადამიანებისთვის სიხარულის მოტანა უყვარს.

"ძალიან ხშირად მოდიან ჩემთან და მეუბნებიან: საშინელი დღე მქონდა, შეყვარებულმა მიმატოვა, მანქანა შემთხვევით ჩამეკეტა, მაგრამ მერე ორი საათი გისმინე და ახლა უკვე ვიცი, რომ ხვალ დილით ადგომას შევძლებ. ეს საუკეთესო რამაა, რაც შეიძლება მოისმინო".

ასე რომ, თუ საყოფაცხოვრებო პრობლემები ზედმეტად გაწუხებთ, დერიკ კარტერს შეიძლება ამ პრობლემებზე პასუხი ჰქონდეს..... ან არც ჰქონდეს. წინასწარ რას გაიგებთ!

რა თქმა უნდა, ეს ყველაფერი არაა. ამას გარდა, 13 ივლისს ეზოში დაგხვდებათ ბერლინური კლუბი სისიფოსი, სიგრილე, სიმწვანე, პიცა და კარგი ხედი, მაგრამ ამ ყველაფერზე შემდეგ სტატიაში ვილაპარაკოთ.