დღეს, თბილისში, ვარდების მოედანზე, MAN-ის ახალი ავტობუსების პრეზენტაცია მოეწყო, რომელსაც თბილისის მერი დავით ნარმანია, ფინანსთა მინისტრი ნოდარ ხადური, ასევე ევროკავშირის, შვედეთის განვითარების ფონდის, ევრობანკის და MAN-ის წარმომადგენლები ესწრებოდნენ.

ავტობუსები ადაპტირებულია შშმ პირებისათვის, რომლებსაც ავტობუსში ასვლის მოთხოვნის შემდეგ, მძღოლი ასვლაში დაეხმარება.

ფოტო: თამო ლიპარტელიანი/on.ge

მას ასევე აქვს გათბობის და კონდიცირების სისტემა. მერის განცხადებით, ავტობუსის მძღოლებისათვის ტრენინგების ჩატარების შემდეგ ახალი ავტობუსები 61 ნომრის ხაზზე, ბაგებიდან ბარათაშვილისკენ, დაიწყებენ მოძრაობას.

როგორც დავით ნარმანია აცხადებს, განსაკუთრებით მნიშვნელოვანია ის ფაქტი, რომ ავტობუსები ბუნებრივ აირზე მუშაობს და გარემოს დაცვის თვალსაზრისით უსაფრთხოა. მისი თქმით, 2017 წლის გაზაფხულისთვის საქართველოში კიდევ 133 ავტობუსი შემოვა:

"მოწოდების გრაფიკი იქნება შემდეგნაირი - 13 ავტობუსი ჩამოვა იანვარში, შემდეგი 60 თებერვალში, ხოლო ბოლო 60 - მარტში. როგორც კი ჩამოვა ავტობუსები, მალევე შევლენ ხაზზე".

პრეზენტაციაზე EBRD-ის დირექტორმა კავკასიაში, ბრუნო ბალვანერამ განაცხადა, რომ ერთ-ერთი მნიშვნელოვანი ფაქტი ისაა, რომ ამ ინიციატივაში გენდერული საკითხი გათვალისწინებულია და პირველ ათ მძღოლს შორის ერთი ქალია.

ფოტო: თამო ლიპარტელიანი/on.ge

თბილისის მერის მრჩეველი ირაკლი ლექვინაძე აღნიშნავს, რომ პროექტის განხორციელებაში საჭირო €34 მილიონიდან, მიღებული €7 მილიონის კონტრიბუტორი ევროკავშირია. პრეზენტაციაზე იმყოფებოდა ასევე ევროკავშირის ელჩი იანოშ ჰერმანი, რომელმაც გარემოს დაცვასა და ქალაქში მანქანების შემცირების საჭიროებაზე ისაუბრა:

"ჩვენი აქცენტი გაკეთდა არამხოლოდ ტექნოლოგიაზე, არამედ სისტემურ ცვლილებაზეც. ჩვენ გვინდა ასეთი თანამედროვე, კომფორტული სატრანსპორტო პარკის საშუალებით ხალხი გადაეჩვიოს პირადი ავტომანქანებით სარგებლობას".

ჰერმანი განმარტავს, რომ ამით საქართველოსა და ევროკავშირს შორის დადებული ასოცირების ხელშეკრულება დაკმაყოფილდება. "მოდით მეგობრებო, ამ ლურჯი ავტობუსებით გავამწვანოთ თბილისი", - ასე დაამთავრა მან თავისი გამოსვლა.

ფოტო: თამო ლიპარტელიანი/on.ge

პრეზენტაციის დასასრულს საზოგადოებისა და მედიის საჩვენებლად ვარდების რევოლუციის მოედნიდან ბარათაშვილის მიმართულებით ორი ავტობუსი დაიძრა.

ფოტო: თამო ლპიპარტელიანი/on.ge

ფოტო: თამო ლიპარტელიანი/on.ge

ფოტო: თამო ლიპარტელიანი/on.ge

ფოტო: თამო ლიპარტელიანი/on.ge