კურიერთან საუბრისას, ენმ-ს წევრი, ირმა ნადირაშვილი იუსტიციის მინისტრის განცხადებას გამოეხმაურა და განაცხადა, რომ არ გამორიცხავს, წინასაარჩევნოდ მისი გუნდის წევრები დააკავონ:

"ეს განცხადებები მიზანმიმართულია, იმაზე რომ ადამიანები იყვნენ შოკში და არ იფიქრონ ქვეყანაში არსებულ ვითარებაზე. ქვეყანაში კი მძიმე ვითარებაა სოციალური კუთხით, ეკონომიკის კუთხით და ა.შ. პოლიტიკური ოპონენტების დევნა ამ ხელისუფლების სტილია. არჩევნების წინ დაკავებები არ გაგვიკვირდება. გიგი უგულავა საარჩევნო შტაბის უფროსი იყო მერის არჩევნების დროს და მეორე ტურის წინ უგულავა დააკავეს. ამიტომ, არაფერი გაგვიკვირდება".

დღეს იუსტიციის მინისტრმა, თეა წულუკიანმა ქვეყანაში დაგეგმილ შესაძლო დესტაბილიზაციასა და ფარულ ჩანაწერებთან დაწყებულ გამოძიებასთან დაკავშირებით განაცხადა, რომ არ გამორიცხავს, ამ საქმეზე გამოძიება დაკავებებით დასრულდეს:

"დესტაბილიზაციას რაც შეეხება, ამგვარი საფრთხე იმიტომ არ არსებობს, რომ სამართალდამცავი სტრუქტურები თავის სიმაღლეზე არიან, მაგრამ მცდელობები არსებობს სხვადასხვა მხრიდან. გამოძიება მიმდინარეობს რამდენიმე საქმეზე ზოგი საბოტაჟის, ზოგი გადატრიალების მუხლით. სანამ გამოძიება დასრულდება, შეიძლება დასრულდეს კიდეც შესაძლო ბრალდებულების დაკავებითაც, მანამდე ჩვენ ჩავატარებთ მშვიდობიან არჩევნებს".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული.

აღნიშნულთან დაკავშირებით სახელმწიფო უსაფრთხოების სამსახურმა გამოძიება სისხლის სამართლის კოდექსის 315-ე მუხლის 1-ლი ნაწილით დაიწყო.