ქართული ოცნებიდან წასული დეპუტატი, ეკა ბესელია პლენარულ სხდომაზე 20 ივნისის აქციის დაშლას გამოეხმაურა და მმართველი პარტიის წევრებს მიმართა, თუ სად იყვნენ იმ ღამეს, როდესაც სპეცრაზმი ახალგაზრდებს ესროდა. ბესელია ამბობს, რომ ქართული ოცნება თავისი ქმედებებით, წინა ხელისუფლბას ემსგავსება.

"თქვენ ვერ ხვდებით, რომ ამ უგუნური ქმედებით, რასაც სჩადიხართ, მოგყავთ ქვეყანაში ის ძალადობრივი რეჟიმი ისევ? თუ ამას ვერ ხვდებით, სახლში წადით და იმ ახალგაზრდებს დაუთმეთ გზა, ვინც ყოველგვარი პოლიტიკური დღის წესრიგის გარეშე დგას ქუჩაში... იმ მაკოს და იმ 21 წლის გოგოს თვალებს რომ თხრიდნენ, როდესაც აღარ იყო პარლამენტში შემოვარდნის საფრთხე, სად იყავით მაშინ? ოთახში კი არ უნდა ყოფილიყავით, ქუჩაში უნდა გასულიყავით და გადაფარებოდი იმ ბავშვებს. სკამების გამო ნუ დაკარგეთ სახე... სადარბაზოებში დაკავებულების ცემა, ქუჩის ბოლოში ადანმიანების დევნა, ეს მიგაჩნიათ რომ ნორმალურია? ამაზე არ უნდა აიღოს პასუხისმგებლობა მინისტრმა", — ამბობს ბესელია

ეკა ბესელია ქართული ოცნების დეპუტატებს ადანაშაულებს იმაში, რომ, სანამ რუსი დეპუტატი, სერგეი გავრილოვი პარლამენტის სპიკერის სკამს დაიკავებდა, მანამ უნდა შეეშალათ ხელი იმ ღონისძიების ჩატარებისთვის:

"ან სად იყავით რომელიმე, რომ ასულიყავით სცენაზე და ჩამოგეყვანათ ის ადამიანი? ან მაშინ სად იყავით, რომ გეუბნებოდით, ეს კობახიძე გადაწვავს ამ პარლამენტს-თქო. თუ მართლა ცეცხლის ალში უნდა გაეხვია აქაურობა რომ მიხვედრილიყავით რა ხდებოდა?"