"მე რომ შინაგან საქმეთა მინისტრი ვყოფილიყავი, თანამდებობას დავტოვებდი", — ეს განცხადება ქართული ოცნების ყოფილმა დეპუტატმა კობა ნარჩემაშვილმა პარლამენტის პლენარული სხდომის დაწყების წინ გააკეთა.

მისი თქმით, დღეს მიდის ძალიან არაჯანსაღი პროცესი "რიგით პოლიციელებზე ჯოხის გადატეხვის", რომელიც პირდაპირ კავშირშია "სისტემის დემორალიზაციასთან".

"პოლიტიკური პასუხისმგებლობა არსებობს იმიტომ კი არა, რომ ხელისუფლებები შენარჩუდნენ, პოლიტიკური პასუხისმგებლობა არსებობს იმისთვის, რომ ინსტიტუტები იყოს გადარჩენილი. მე მოვუწოდებ ყველა საშუალო, მაღალი თუ უმაღლესი რანგის პირებს, გამოიჩინონ პოლიტიკური პასუხისმგებლობა“, — განაცხადა კობა ნარჩემაშვილმა.

მისივე თქმით, ეს არის სამწუხარო მოცემულობა, რომელიც შექმნა ქართულმა ოცნებამ.

„მან აირჩია უკიდურესად დესტრუქციული ძალა მთავარ ოპონენტად და ამ დესტრუქციულ ძალასთან დაპირისპირებაში ნელ-ნელა თვითონ დაემსგავსა წინა ხელისუფლებას. ეს პასუხისმგებლობა მაქსიმალურად სწრაფად უნდა იყოს აღებული. ამ პოლიციელების მოქმედება ღამის ორის ნახევრის შემდეგ, 21 ივნისს, ძალიან ჰგავდა წინა ხელისუფლების მოქმედებას", — თქვა ნარჩემაშვილმა.

საქართველოს პარლამენტში 20 ივნისის აქციის დაშლის შემდეგ პირველი პლენარული სხდომა იმართება. სხდომის პარალელურად ძალა ერთობაშიას აქტივისტები პარლამენტის შენობასთან აქციას მართავენ და პარლამენტში შემოსვლას ითხოვენ.