საქართველოს მესამე პრეზიდენტი, მიხეილ სააკაშვილი ამბობს, რომ ვინც 2020 წელს პროპორციული წესით არჩევნების ჩატარებას დათანხმდება, სულელი ან ნაყიდია. ამის შესახებ მან ვიდეომიმართვაში ისაუბრა.

სააკაშვილი აცხადებს, რომ მთავარი მოთხოვნა არა 2020-ში, არამედ ახლა პროპორციული წესით, რიგგარეშე საპარლამენტო არჩევნების ჩატარება უნდა იყოს.

"ახლა აქ საუბარია იმაზე, რომ ამ კაცმა უნდა გადააყენოს გახარია, გამოუშვას ყველა დაპატიმრებული და დაუყოვნებლივ დანიშნოს არჩევნები პროპორციული წესით, ოღონდ რიგგარეშე, გამოცვალოს ცესკო ნაყიდი თავმჯდომარე, თამარ ჟვანია, ჩამოიყვანს საერთაშორისო დამკვირვებლები და ჩავატაროთ ახალი არჩევნები", — თქვა სააკაშვილმა.

ის ამბობს, რომ ყველაფერი დანარჩენი არის სულელებზე გათვლილი ოლიგარქის, საქართველოს მტრის, ივანიშვილის აფერისტული სქემის განხორციელების მცდელობა.

"ჩვენი პასუხი უნდა იყოს ის, რომ ეს აქციები გავრცელდეს მთელ საქართველოზე, თბილისის სხვადასხვა რაიონებში გადაინაცვლოს, ყველა ქალაქში, ყველა სოფელში. ივანიშვილი უნდა ჩამოშორდეს ქართულ პოლიტიკას. მისი ბინძური მარწუხები უნდა მოშორდეს ქართველ ხალხს. მეტი გამოსავალი აქედან არ არსებობს", — აღნიშნა სააკაშვილმა.

ქართული ოცნების ლიდერის, ბიძინა ივანიშვილის განცხადებით, 2020 წელს პროპორციული წესით, ბარიერის გარეშე არჩევნები ჩატარება. 2020 წელს არჩევნების პროპორციული წესით ჩატარება იყო ერთ-ერთი მოთხოვნა, რომელსაც რუსთაველზე შეკრებილი მოქალაქეები ითხოვენ.