საქართველოს ავიახაზებმა, ჯორჯიან ეარვეისმა რუსეთში ფრენების აკრძალვის შესახებ წერილი მიიღო. ამის შესახებ On.ge-ს კომპანიის პრესსამსახურმა განუცხადა.

ქართული კომპანიებისთვის რუსეთში ფრენების აკრძალვის შესახებ ინფორმაცია დღეს, 22 ივნისს რუსეთის ტრანსპორტის სამინისტრომ გაავრცელა. ერთ-ერთი მოთხოვნა "საავიაციო უაფრთხოების" დადასტურებაა. თუმცა აღნიშნული ავიაკომპანია მსოფლიოს ისეთ განვითარებულ ქვეყნებში დაფრინავს, როგორიცაა დიდი ბრიტანეთი, გერმანია, საფრანგეთი და ა.შ.

რუსეთის ტრანსპორტის სამინისტროში აცხადებენ, რომ, გარდა "საავიაციო უაფრთხოების" დადასტურებისა, საქართველოს მხარეს 792 543,19 აშშ დოლარისა და 592 251,95 რუსული რუბლის ოდენობის დავალიანება აქვს.

გუშინ, 21 ივნისს ვლადიმერ პუტინმა საქართველოს მიმართულებით რუსული ავიაკომპანიების ფრენები აკრძალა. "რუსეთის ნაციონალური უსაფრთხოების უზრუნველსაყოფად" ასე ჰქვია დოკუმენტს, რომელშიც პუტინი აცხადებს, რომ 2019 წლის 8 ივლისიდან რუსულ ავიაკომპანიებს, მათ შორის კომერციულებს დროებით ეკრძალებათ რუსეთის ფედერაციიდან საქართველოს მიმართულებით ფრენა.