"ვერ უშველის, რომ რაღაც სტრუქტურაში არის გაწევრიანებული", — ბოდბელი მთავარეპისკოპოსი მეუფე იაკობი ემუქრება სპეცრაზმელებს, რომლებმაც ახალგაზრდა გოგოს თვალი დაუზიანეს და დამიზნებით ესროდნენ აქციის მონაწილეებს. ამის შესახებ მან TV პირველის ეთერში იმ სატელეფონო ინტერვიუში ისაუბრა, რომლის ინიციატორიც თავადვე იყო.

"ის ადამიანი უნდა გადმოგვცენ ქართველებს, რომლებიც ზემოდან ისროდა და თავისიანმა აუკრა ხელი. ის უნდა გადმოგვცენ. ისე ესროდა თითქოს ირმებს ესროდა და მაგი არ უნდა შერჩეს არავის. ეს არ არის არც მინისტრის, არც ვიღაცის დანაშაული. ყველგან არიან მანიაკები საერთოდ. ალბათ მოვძებნი და ვნახავ მაგას და თავისას მიიღებს... მიპოვნიან, მომიყვანენ და თვალგამოთხრილი გოგო რასაც იტყვის, იმას მიიღებს ის", — განაცხადა მეუფე იაკობმა.

მთავარეპისკოპოსს მიაჩნია, რომ სპეცრაზმმა გააკეთა ის, რისი ბრძანებაც არ ჰქონდათ, რადგან "მეტი ვეღარ მოითმინეს". მისი თქმით, აქციის მსხვერპლის გარეშე დაშლაც შეიძლებოდა.

"თუნდაც წყლის ჭავლით და გაზით და არ იქნებოდა საჭირო იმ რაღაცის გამოყენება, რომლებიც ნებისმიერ ქართველს სინათლეს წაართმევდა. გუშინ რომ ვუყურებდი ეს ადამიანები შეიძლება კრიმინალებად მოგენათლა, მაგრამ ალბათ მე ახალგაზრდობაში უარესს ვიზამდი...მე ახალგაზრდებს არ ვამტყნებ, არც პოლიციას არ ვამტყუნებ. მაგრამ იმას ვერასდროს ვერ გავიგებ, რატომ ესროლეს რეზინის ტყვიები", — განაცხადა იაკობმა.

20 ივნისის აქცია

20 ივნისს ღამით ოკუპაციის გასაპროტესტებლად შეკრებილი მოქალაქეები სამართალდამცავებმა რეზინის ტყვიებით, ცრემლსადენი გაზითა და წყლის ჭავლის დაშალეს. დაშავებულია ათეულობით მოქალაქე, ორს თვალი აქვს დაკარგული. დაკავებულია 305 აქციის მონაწილე. დაშავებულებიდან სამედიცინო დაწესებულებაში 55 პაციენტი რჩება. მათგან 3 რეანიმაციულ განყოფილებაში, მართვით სუნთქვაზე იმყოფება.

მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.