პაატა ბურჭულაძის ბლოკის მიერ გამართულ საგანგებო ბრიფინგზე ჟურნალისტების შეკითხვას, რამდენად რეალურია, რომ ბურჭულაძე გირჩის წევრებს აშანტაჟებდა, მოძრაობის ლიდერმა ასე უპასუხა:

"მე არ ვარ ის ადამიანი, რომ კინკლაობაზე და ჭორაობაზე საუბარი დავიწყო. მე აბსოლუტურად დარწმუნებული ვარ, რომ ეს თანხები მოდიოდა ბატონი ბიძინა ივანიშვილისგან. მეტსაც გეტყვით, თანხების გარდა, იქ იყო მთელი სქემა და თამაში, თუ როგორ შეიძლებოდა ჩვენს გარშემო ჩატარებულიყო რაღაც სხვანაირი თამაში, რომელიც გაიშიფრა. ამიტომაც, ძალიან დროული იყო ეს გადაწყვეტილება, რომელიც 2 საათით ადრე მივიღე, რადგან 2 საათით ადრე გახდა ზუსტად ცნობილი პიროვნებები, მათი გუნდიდან, ერთმა პიროვნებამ უკვე ყველაფერი გვითხრა, თუ როგორ და რა სქემა იყო. კონკრეტულ პირებს არ ვიტყვი, ეს რომ ასე იყო, ამაში დარწმუნებული ვარ".

27 სექტემბერს გირჩმა განაცხადა, რომ ბურჭულაძის ბლოკს ტოვებდა. ამის მიზეზად პოლიტიკურმა სუბიექტმა დაასახელა ის, რომ ბლოკში არის როგორც მენეჯტმენტის, ისე ფინანსური პრობლემები. მათ ასევე განმარტეს, რომ აღნიშნული გადაწყვეტილების გამო, საპარლამენტო არჩევნებში მონაწილეობას წელს ვეღარ მიიღებდნენ.

თავის მხრივ, პაატა ბურჭულაძემ განმარტა, რომ გირჩის ბლოკიდან გაშვების გადაწყვეტილება თავად მას შემდეგ მიიღო, რაც გაირკვა, რომ გირჩს ბიძინა ივანიშვილი აფინანსებდა.