საქართველოს პრეზიდენტი, სალომე ზურაბიშვილი საზოგადოებას სიმშვიდისკენ მოუწოდებს. ამის შესახებ ის პარლამენტთან მიმდინარე მოვლენებთან დაკავშირებით Facebook-ზე წერს.

მისი თქმით, ქვეყნისა და საზოგადოების გახლეჩვა და შიდა დაპირისპირება სხვას არავის უწყობს ხელს, თუ არა რუსეთს. ზურაბიშვილი წერს, რომ ვინც შიდა დაპირისპირებას აქეზებს და ხელს უწყობს, ის ნებსით თუ უნებლიეთ, რუსეთის პოლიტიკის გამტარებელი და მისი გეგმების შემსრულებელი.

"ახლა გადახედეთ და ნახეთ, ვინ ცდილობს მუდმივად ნებისმიერი პრობლემა დესტაბილიზაციის კერად აქციოს და ბევრ რამეს ნათელი მოეფინება. და ბოლოს, სრულიად მიუღებელია რომ გარედან უცხო ქვეყნის მოქალაქე "თავის შექმნილ" პოლიციას დაუმორჩილებლობისკენ მოუწოდებდეს და ასეთი ანტიკონსტიტუციური მოწოდება საზოგადოებრივი არხით ვრცელდებოდეს! დროა, სახელმწიფომ რეაგირება მოახდინოს ყველა ამ დარღვევაზე წესრიგი დაამყაროს და საშუალება არ მისცეს დესტრუქციულ ძალებს, მოსკოვის გეგმები გაატარონ", — წერს ზურაბიშვილი.

მისივე თქმით, ძალიან დიდი დანაშაული იყო, რაც დღეს მოხდა. თუმცა, მისივე თქმით, "ეს არანაირად არ ამართლებს ხელოვნურად აგორებულ ტალღას, ანტისახელმწიფოებრივ ქმედებებს, შიგნით თუ გარეთ გაკეთებულ მოწოდებებს, რომელიც არის მიმართული პარლამენტში შეჭრისკენ და ხელისუფლების გადატრიალებისკენ".

სპეცრაზმმა პარლამენტის წინ მიმდინარე აქცია რეზინის ტყვიებითა და ცრემლსადენი გაზით დაშალა. არიან დაშავებულები. ამ დროისთვის პარლამენტთან ვითარება დაძაბულია.