მთავარი პროკურატურის განცხადებით, სასამართლომ სამსახურებრივი უფლებამოსილების ძალადობით გადამეტების ფაქტზე ბრალდებულ შს მინისტრის ყოფილ მოადგილეს გია ლორთქიფანიძეს აღკვეთის ღონისძიების სახით პატიმრობა შეუფარდა და მის მიმართ გამოცხადდა ძებნა.

პროკურატურა აცხადებს, რომ ლორთქიფანიძეს დაუსწრებლად წარედგინა ბრალდება სსკ-ის 333-ე მუხლის მე-3 ნაწილის ბ ქვეპუნქტით, რაც სასჯელის სახედ და ზომად ითვალისწინებს თავისუფლების აღკვეთას 5-დან 8 წლამდე ვადით.

პროკურატურის მტკიცებით, 2011 წლის 26 მაისს, რუსთაველის გამზირზე შეკრებილი მომიტინგეების დარბევა და მათი მასობრივი დაკავება, შს ყოფილი მინისტრის ვანო მერაბიშვილის ბრძანებით დაევალა მის მოადგილეს გია ლორთქიფანიძეს.

"დანაშაულებრივი გეგმის სისრულეში მოყვანის მიზნით, 2011 წლის 25 მაისს, ჯერ კიდევ მიტინგისთვის სანქცირებული ვადის გასვლამდე, პოლიციამ წინასწარ გადაკეტა რუსთაველის გამზირი და მის მიმდებარედ არსებული ქუჩები, ხოლო თავისუფლების მოედანი გადაიკეტა კონსტიტუციური უსაფრთხოების დეპარტამენტისა და შს სამინისტროს სხვა დანაყოფების მეშვეობით, რომელთაც ადგილზე ხელმძღვანელობდნენ გია ლორთქიფანიძე და დავით ახალაია.

სწორედ დასახელებულ პირთა მეთაურობით, მშვიდობიანი მომიტინგეების წინააღმდეგ გამოყენებულ იქნა გაუმართლებლად არათანაზომიერი და გადაჭარბებული ძალა. შედეგად, გარდაიცვალა ორი ადამიანი, დასახიჩრდა და ჯანმრთელობის სხვადასხვა ხარისხის დაზიანებები მიიღო დაახლოებით 250-მდე ადამიანმა, ხოლო უკანონოდ დაკავებული იქნა 800-მდე მომიტინგე".