საქართველოს ყოფილი პრეზიდენტი, გიორგი მარგველაშვილი აცხადებს, რომ მისი მისვლა პრაიდზე "ტყუილი იქნებოდა, რადგან ის ამ ორიენტაციის ადამიანი არაა". მისივე თქმით, არასწორი მესიჯი იქნებოდა.

"პრაიდში მისვლა არაა საჭირო, მაგრამ თუ შენ ხედავ, რომ ამ პრაიდს იცავს პოლიცია და ამ პოლიციას ვინმე ურტყამს, დაიცავი პოლიციელი და დადექი შუაშია. პრაიდში ჩემი მისვლა იქნებოდა ტყუილი, რადგან მე არ ვარ ამ ორიენტაციის ადამიანი. მე ვხედავ, რომ ისინი დასაცავები არიან, მაგრამ მე მათგანი არ ვარ. მე დავდგებოდი იმ პოლიციელის გვერდით, რომელიც იცავს პრაიდს და იქ დავინახავდი საქართველოს, ქრისტიანობისა და ადამიანის უფლებების დაცვას", — განაცხადა მარგველაშვილმა გადაცემა პოლიტმეტრში.

გარდა ამისა, ყოფილმა პრეზიდენტმა ისაუბრა თბილისი პრაიდსა და აგრესიულად განწყობილ ჯგუფებზე. მისი თქმით, თუ ვინმეს აღლუმი არ მოსწონს, დაიცვან ლგბტ თემი და აღლუმი საჭირო აღარ იქნება.