დავით სერგეენკო 7-წლიანი მინისტრობის შემდეგ ჯანდაცვის მინისტრის პოსტს ტოვებს. ამის შესახებ მან ინფორმაცია ჟურნალისტებს დაუდასტურა. მისივე თქმით, თანამდებობის დატოვებასთან დაკავშირებით პრემიერ-მინისტრთან ერთად ერთობლივ განცხადებას გააკეთებს.

დავით სერგეენკოს განცხადებით, გადაწყვეტილებას წინ ხანგრძლივი კონსულტაციები უძღოდა. ის ამბობს, რომ ქართული ოცნების გუნდში რჩება. რაც შეეხება იმ ინფორმაციას, რომ მისი გადადგომა საყოველთაო ჯანდაცვის პროგრამის ჩავარდნას უკავშირდება, სერგეენკო პასუხობს:

"მას ბევრი შემფასებელი ჰყავს, საქართველოს საზოგადოება და საერთაშორისო ორგანიზაციები. ასე რომ, მე ვფიქრობ, რომ დღეს ყველაფერს ცალსახა პასუხი გაეცემა".

პროფესიით ექიმი დავით სერგეენკო მინისტრობამდე საჩხერის საავადმყოფო-პოლიკლინიკური გაერთიანებაში გენერალურ დირექტორად მუშაობდა. იუსტიციის მინისტრ თეა წულუკიანთან ერთად დავით სერგეენკო ქართული ოცნების ხელისუფლებაში ყველაზე ხანგრძლივად მოქმედი მინისტრია. ჯანდაცვის მინისტრის პოსტი მან 2012 წლის 25 ოქტომბერს დაიკავა.

მისი მინისტრობის პერიოდს უკავშირდება C ჰეპატიტის ელიმინინაციისა და საყოველთაო ჯანდაცვის პროგრამები. ამასთანავე მისი მინისტრობის დროს უკეთესი სამუშაოები პირობებისთვის სოციალური მუშაკები გაიფიცნენ.

NDI-ს 2019 კვლევების თანახმად, პოლიტიკურ ლიდერებს შორის ყველაზე დადებითად მოსახლეობა დავით სერგეენკოს მიმართ არის განწყობილი. იგივე შედეგი იყო NDI-ს 2018 წლის კვლევის მიხედვით.