ლონდონში, კრისტის აუქციონზე, ფარაონ ტუტანხამონის 28 სანტიმეტრიანი ქანდაკების გაყიდვაა დაგეგმილი, აუქციონი 4 ივლისს უნდა შედგეს. ეგვიპტის ანტიკვარიატის სამინისტრო ეჭვს გამოთქვამს, რომ ქანდაკება შესაძლოა მოპარული იყოს. აქედან გამომდინარე, გაყიდვის შესაჩერებლად აუქციონს და იუნესკოს მიმართავს. სამინისტრო ქანდაკების ოფიციალურ დოკუმენტებს და წარმომავლობის მტკიცებულებას ითხოვს. ბრიტანეთის მუზეუმის დელეგაცია ეგვიპტის მთავრობის წარმომადგენლებთან ერთად, ქანდაკების ბედის გადასაწყვეტად აღდგომის კუნძულზე მიემგზავრება. ეგვიპტის საელჩო ლონდონში კი ბრიტანეთის საგარეო საქმეთა სამინისტროს ქანდაკების ეგვიპტისთვის გადაცემას და აუქციონის შეჩერებას მოითხოვს.

ფოტო: Christie's

კრისტის აუქციონის პრესრელიზში კი ვკითხულობთ, რომ ქანდაკება 1985 წელს მიუნხენში მოღვაწე ხელოვნებით მოვაჭრე ჰაინც ჰერცერისგან არის შეძენილი. იქამდე კი ჯოსეფ მესინას და პრინც ვილჰელმ ვონ ტურნ უნდ ტაქსისის მფლობელობაში იყო.

ჩვენ გასაყიდად ვერ წარვადგენთ ნივთს, რომლის წარმომავლობასთან დაკავშირებით ეჭვები არსებობს. კრისტის აუქციონი მკაცრად იცავს საერთაშორისო შეთანხმებებსა და წესებს კულტურული ფასეულობების და მემკვიდრეობის მიმართ

ვკითხულობთ აუქციონის ოფიციალურ განცხადებაში.

ქანდაკება ამჟამად რესანდროს კოლექციაშია, რომელიც მსოფლიოში ყველაზე ცნობილი ეგვიპტურ ხელოვნებაზე ორიენტირებული კერძო კოლექციაა. სააუქციონო სახლის ვარაუდით, ტუტანხამონის ქანდაკება 4 მილიონ ფუნტზე მეტად შეიძლება გაიყიდოს, რაც 5.1 მილიონი ამერიკული დოლარის ექვივალენტია.